ជនប៉ាឡេស្ទីន បានជួបជុំគ្នានៅផ្ទះបាយស៊ុប ស្ថិតក្នុងជំរំ Beit Lahiya តំបន់ហ្កាហ្សា ដើម្បីទទួលបានអាហារក្តៅ ។ ជនប៉ាឡេស្ទីនជាច្រើននាំគ្នាគ្រវីឆ្នាំទទេរ រង់ចាំដល់វេនរបស់ពួកគេ ដើម្បីទទួលបានអាហារ ។

លោក Salah al-Madhoun គឺជាជនប៉ាឡេស្ទីនមួយរូប និយាយថា មនុស្សស្រេកឃ្លានកាន់តែខ្លាំង ហើយពួកគេជិតស្លាប់អស់ហើយ ស្របពេលដែលតម្រូវការកើនឡើងនៅតាមផ្ទះបាយស៊ុប ប៉ុន្តែវាមិនគ្រប់គ្រាន់នោះទេ ។

លោកថា អគារ ៤ខ្នងរបស់លោកត្រូវបានបំផ្លាញ ហើយលោកធ្លាក់ដល់កម្រិតសូន្យ ក្រោយលោកប្រឹងប្រែងអស់រយៈពេលជាយូរ ។ ការខំប្រឹងដណ្តើមអាហារ និងទឹកទាំងនេះ គឺដោយសារខ្វះខាតជំនួយ និងការបិទច្រក ស្ថានភាពកាន់តែអាក្រក់ទៅ មនុស្សកាន់តែស្រេកឃ្លាន ពួកគេជិតស្លាប់អស់ហើយ ។

លោកបន្តថា ពួកយើងបានអំពាវនាវដល់អ្នករាល់គ្នា ដល់ប្រទេសទាំងអស់ អង្គការសហប្រជាជាតិ លោកប្រធានាធិបតីសហរដ្ឋអាមេរិក Donald Trump ពិភពលោកទាំងមូល អង់គ្លេស ពិភពលោកទាំងមូល បារាំង អ្នកណាក៏ដោយឲ្យតែមានឥទ្ធិពល ត្រូវសង្រ្គោះជីវិតមនុស្សទាំងនេះ ។ នេះគឺជាមនុស្សដែលត្រូវបានគេធ្វើខុសធ្ងន់ គឺធ្វើខុសធ្ងន់បំផុត ស្ថានភាពរបស់ពួកគេកាន់តែអាក្រក់ខ្លាំងណាស់ ។

អ៊ីស្រាអែល បានបិទច្រកទាំងស្រុងលើទំនិញទាំងអស់ចូលទៅក្នុងតំបន់ហ្កាហ្សា ចាប់តាំងពីការចាប់ផ្តើមសង្រ្គាមឡើងវិញកាលពីខែមីនា ។ ការចែកចាយអាហារបន្ទាន់ ត្រូវបានបញ្ចប់ ហាងធ្វើដំបានបិទទ្វារ ក្នុងផ្សារគ្មានទំនិញលក់ ។

អ៊ីស្រាអែលច្រានចោលការលើកឡើងថា តំបន់ហ្កាហ្សាកំពុងប្រឈមនឹងវិបត្តិអត់ឃ្លាន ហើយយោធាអ៊ីស្រាអែល បានចោទប្រកាន់ក្រុមហាម៉ាសដែលគ្រប់គ្រងតំបន់ហ្កាហ្សាថា បានលួចជំនួយ ដូច្នេះហើយពួកគេត្រូវតែបន្តកាត់ផ្តាច់ការផ្គត់ផ្គង់ទាំងអស់ ដើម្បីការពារកុំឲ្យពួកគេទទួលបាន ។

ទោះបីជាយ៉ាងណាក៏ដោយ ក្រុមហាម៉ាសនិយាយថា ពួកគេពុំបានកេងប្រវ័ញ្ចជំនួយនោះទេ និងបានចោទប្រកាន់អ៊ីស្រាអែលថាប្រើប្រាស់ភាពអត់ឃ្លានជាតាក់ទិកយោធា ។

គួររំឭកថា ការវាយប្រហារលើអ៊ីស្រាអែលដោយក្រុមហាម៉ាស់កាលពីខែតុលា ឆ្នាំ ២០២៣ បានសម្លាប់មនុស្ស ១.២០០នាក់ និងចាប់ចំណាប់ថ្នូរ ២៥១នាក់ ហើយចាប់តាំងពីនោះមក ការវាយប្រហាររបស់អ៊ីស្រាអែលលើតំបន់ហ្កាហ្សា បានសម្លាប់មនុស្សជាង ៥១.៣០០នាក់ ៕