យោងតាមសេចក្តីរាយការណ៍ពីសារព័ត៌មានរដ្ឋចិន បានឲ្យដឹងថា ការសាងសង់អគារខ្ពស់បំផុតដែលត្រូវបានគេបោះបង់ចោលរបស់ពិភពលោក អាចនឹងចាប់ផ្តើមឡើងវិញនៅសប្តាហ៍ក្រោយ ពោលគឺរយៈពេលជិត ១០ឆ្នាំ ក្រោយបញ្ឈប់ការសាងសង់ ។

អគារ Goldin Finance 117 កម្ពស់ ៥៩៧ម៉ែត្រ ដែលស្ថិតនៅទីក្រុងកំពង់ផែ Tianjin នៅភាគខាងជើងប្រទេសចិន ប៉ុន្តែមិនទាន់បានបញ្ចប់ចាប់តាំងពីឆ្នាំ ២០១៥រហូតមក ស្របពេលមានផលវិបាកហិរញ្ញវត្ថុធំនោះ បច្ចុប្បន្នត្រូវបានគេរំពឹងថានឹងបញ្ចប់ការសាងសង់នៅឆ្នាំ ២០២៧ខាងមុខ ។

យោងតាមការអះអាងរបស់ក្រុមហ៊ុនស្ថាបត្យកម្ម P&T Groupបានឲ្យដឹងថា ស្ថិតក្នុងកម្ពស់ ១១៧ជាន់ ប៉មអគារនេះ គ្រោងនឹងក្លាយជាអគារខ្ពស់បំផុតរបស់ចិន ពេលដែលវាចាប់ផ្តើមចាក់គ្រឹះសាងសង់កាលពីឆ្នាំ ២០០៨ ។ ពួកគេបន្តថា អគារនេះបានប្រើប្រាស់សសរស្តមធំៗ ដើម្បីការពារប្រឆាំងនឹងខ្យល់បក់ និងការរញ្ជួយដី ហើយវាមានការិយាល័យ និងសណ្ឋាគារផ្កាយ ៥នៅជាន់លើ ។

ប៉ុន្តែគម្រោងបានឈប់ដំណើរការ បន្ទាប់ពីផ្សារភាគហ៊ុនចិនធ្លាក់ចុះនៅឆ្នាំ ២០១៥ ធ្វើឲ្យអនាគតក្រុមហ៊ុន Goldin Properties Holdings ដែលមានមូលដ្ឋាននៅទីក្រុងហុងកុង ស្ថិតក្នុងស្ថានភាពពុំច្បាស់លាស់ ។

ក្រុមហ៊ុនអភិវឌ្ឍន៍អចលនទ្រព្យដែលស្ថាបនិក Pan Sutongរបស់ពួកគេ ធ្លាប់ស្ថិតក្នុងចំណោមអ្នកជំនួញមានជាងគេបំផុតនៅហុងកុងនោះ បានរំលាយចោលការងារសាងសង់អគារខ្ពស់នេះ ចាប់តាំងពីពេលនោះមក ។

ការអនុញ្ញាតឲ្យសាងសង់ថ្មីនេះ ប្រើថវិកាត្រឹម ៧៨លានដុល្លារប៉ុណ្ណោះ ហើយបច្ចុប្បន្នគម្រោងមួយនេះ គ្រប់គ្រងដោយក្រុមហ៊ុនរដ្ឋចិន BGI Engineering Consultants ។

ដោយឡែក គោលបំណងអនាគតរបស់អគារ នៅពុំទាន់ដឹងច្បាស់នោះទេ ប៉ុន្តែការអនុញ្ញាតឲ្យសាងសង់ថ្មី បង្ហាញពីការអភិវឌ្ឍពាណិជ្ជកម្មដ៏មានសក្តានុពល ៕