អ្នកកាន់ទុក្ខប្រហែល ២៥០.០០០ នាក់បានចូលទៅកាន់ព្រះវិហារ Basilica នៅទីលានចតុរង្គសេនភីធើរ (St Peter) កាលពីថ្ងៃសុក្រ ដើម្បីគោរពវិញ្ញាណក្ខន្ធសម្តេចប៉ាប ហ្រ្វង់ស៊ីស ដោយមើលព្រះមឈូសាបើកចំហនៅប៉ុន្មានម៉ោងចុងក្រោយ មុនពេលពិធីបុណ្យព្រះសពរបស់ព្រះអង្គនៅថ្ងៃសៅរ៍នេះ។

បុរីវ៉ាទីកង់ បានបញ្ចប់ការផ្សាយតាមទូរទស្សន៍អំពីដំណើរការចូលគោរពដែលបានដំណើរការជាបន្តបន្ទាប់ មុនពេលពិធីឯកជនមួយ ដើម្បីបិទគម្របព្រះមឈូសារបស់ព្រះអង្គ។

សម្តេចប៉ាប មានព្រះជន្ម៨៨ព្រះវស្សា បានដឹកនាំគ្រឹស្តសាសនាចាប់តាំងពីឆ្នាំ២០១៣ បានយាងចូលទីវង្គត់កាលពីថ្ងៃចន្ទសប្តាហ៍នេះ បន្ទាប់ពីទទួលរងជំងឺដាច់សរសៃឈាមខួរក្បាល ខណៈព្រះអង្គបានធូស្រាលពីជំងឺរលាកសួតជាច្រើនសប្តាហ៍មក។

បូរីវ៉ាទីកង់ បាននិយាយថា មនុស្សប្រហែល ២៥០.០០០ នាក់ មកពីជុំវិញពិភពលោកបានតម្រង់ជួរដើម្បីនិយាយពាក្យលាចុងក្រោយ ចាប់តាំងពីព្រះសពរបស់ព្រះអង្គត្រូវបាននាំយកទៅ ព្រះវិហារ Basilica នៅទីលានចតុរង្គសេនភីធើរ (St Peter) កាលពីថ្ងៃពុធដើម្បីដាក់ឲ្យអ្នកកាន់ទុក្ខចូលគោរពវិញ្ញាណក្ខន្ធជាសាធារណៈ។

ក្នុងចំណោមភ្ញៀវចុងក្រោយក៏មានប្រធានាធិបតីបារាំង លោក Emmanuel Macron និងភរិយារបស់លោក ដែលបានឈរជាមួយគ្នានៅផ្នែកម្ខាងនៃព្រះមឈូសារមួយសន្ទុះ។