បន្ទាយមានជ័យ៖ លោកឧត្តមសេនីយ៍ទោ សិទ្ធិ ឡោះ ស្នងការនៃស្នងការដ្ឋាននគរបាល ខេត្តបន្ទាយមានជ័យ នៅរសៀលថ្ងៃទី២៥ ខែមេសា ឆ្នាំ២០២៥នេះ បានអញ្ជើញ​ដឹកនាំកិច្ចប្រជុំពង្រឹង​បច្ចេកទេសការងារជំនាញ ​និងផ្សព្វផ្សាយផែនការចាំបាច់ ដល់កងកម្លាំង​នគរបាលគ្រប់អង្គភាពចំណុះ នៅស្នងការដ្ឋាននគរបាលខេត្តដើម្បីបង្ការទប់ស្កាត់រាល់​បទល្មើស​ផ្សេងៗ​ប្រកបដោយប្រសិទ្ធភាព។

លោកឧត្តមសេនីយ៍ទោ សិទ្ធិ ឡោះ បានដាក់ចេញផែនការការងារដល់កងកម្លាំងនគរបាល​ទូទាំងខេត្ត ​ត្រូវធ្វើការពង្រឹងការអនុវត្ត តួនាទី ភារកិច្ចឲ្យបានល្អដើម្បីបន្តពង្រឹងបង្ការ ទប់ស្កាត់ បង្ក្រាបរាល់បទល្មើសនានាគ្រប់ប្រភេទក្នុងការពង្រឹងគ្រប់គ្រងការស្នាក់នៅរបស់ជនបរទេស កម្លាំងការិយាល័យនគរបាលជំនាញ អធិការដ្ឋាននគរបាលគ្រប់ក្រុង/ស្រុក ត្រូវបន្តពង្រឹងការ​ចុះផ្សព្វផ្សាយគោលនយោបាយភូមិ ឃុំ/សង្កាត់មានសុវត្ថិភាពនិងច្បាប់ចរាចរណ៍ផ្លូវគោក និងការផល​ប៉ះពាល់នៃគ្រឿងញៀន តាមគ្រឹះស្ថានសិក្សា រោងចក្រ សហគ្រាសនានា និងតាមមូលដ្ឋានឲ្យបានទូលំទូលាយក្នុងភូមិសាស្រ្តខេត្តបន្ទាយមានជ័យដើម្បីធានាបានសុខសុវត្ថិភាពសង្គមជូនបងប្អូនប្រជាពលរដ្ឋក្នុងមូលដ្ឋានបានល្អប្រសើរ។

លោកឧត្តមសេនីយ៍ទោ ស្នងការការខេត្តបន្តថា ​កម្លាំងនគរបាលចរាចរណ៍ទាំងអស់ ត្រូវសហការ​គ្នាធ្វើយ៉ាងណាបង្ការ ទប់ស្កាត់ គ្រោះថ្នាក់​ចរាចរណ៍កុំឱ្យកើនឡើង ​ដោយវិធីសាស្ដ្រផ្សព្វផ្សាយអប់រំ និង​រឹតបន្ដឹង​ច្បាប់ចរាចរណ៍​ផ្លូវគោកឲ្យមានប្រសិទ្ធភាព។ ដោយ​យោងស្មារតីអង្គប្រជុំ ស្តីពីការ​ត្រួតពិនិត្យ វាយតម្លៃលទ្ធផល ការរឹតបន្តឹងការអនុវត្តច្បាប់ ស្តីពីចរាចរណ៍ផ្លូវគោក ប្រចាំត្រីមាសទី១ ឆ្នាំ២០២៥ របស់អគ្គស្នងការដ្ឋាននគរបាលជាតិ កាលពីថ្ងៃទី២៤ ខែមេសា ឆ្នាំ២០២៥កន្លងទៅ ឯកឧត្តម នាយឧត្តមសេនីយ៍ ស ថេត អគ្គស្នងការដ្ឋាននគរបាលជាតិ បានផ្ដល់អនុសាសន៍ណែនាំ ឱ្យនគរបាលចរាចរណ៍គ្រប់ស្នងការដ្ឋានរាជធានី/ខេត្ត ត្រូវបន្ដសកម្មភាពធ្វើការផ្សព្វផ្សាយអប់រំ អំពីច្បាប់ចរាចរណ៍ផ្លូវគោក ទៅកាន់ប្រជាពលរដ្ឋឱ្យកាន់តែមានការយល់ដឹងបន្ថែមទៀត ដោយបូករួម​ជាមួយការអនុវត្តច្បាប់ ប្រកបដោយកាយវិការទន់ភ្លន់ និងវិជ្ជាជីវៈ សាកសមជាមន្ត្រី​នគរបាលអ្នកអនុវត្តច្បាប់ ប៉ុន្ដែម៉ឺងម៉ាត់ចំពោះតួនាទីភារកិច្ចរបស់ខ្លួនផងដែរក្នុងការអនុវត្តច្បាប់។ឃិនសារិទ្ធ