វិមានក្រឹមឡាំងបាននិយាយថា ប្រធានាធិបតីរុស្ស៊ីលោក Vladimir Putin កាលពីថ្ងៃសុក្រ បានពិភាក្សាអំពី «លទ្ធភាព» នៃកិច្ចចរចាដោយផ្ទាល់ជាមួយអ៊ុយក្រែន នៅក្នុងជំនួបជាមួយបេសកជនសហរដ្ឋអាមេរិក ខណៈប្រធានាធិបតីសហរដ្ឋអាមេរិក លោក Donald Trump បានអះអាងថា ភាគីជម្លោះទាំងពីរ «ខិតកាន់តែជិតដល់កិច្ចព្រមព្រៀង»។

ប៉ុន្តែប្រធានាធិបតីអ៊ុយក្រែន លោក Volodymyr Zelensky បានច្រានចោលជាថ្មីម្តងទៀតនូវការលើកឡើងដែលថា អ៊ុយក្រែនបោះបង់ចោលតំបន់គ្រីម៉េ ខណៈកិច្ចពិភាក្សារវាង លោកPutin និងបេសកជនប្រធានាធិបតីសហរដ្ឋអាមេរិក លោក Steve Witkoff បានធ្វើឡើង បន្ទាប់ពីឧត្តមសេនីយ៍ជាន់ខ្ពស់រុស្ស៊ីម្នាក់ ត្រូវបានសម្លាប់នៅក្នុងការវាយប្រហារដោយគ្រាប់បែកបំផ្ទុះរថយន្ត នៅខាងក្រៅទីក្រុងមូស្គូ។

ដោយទៅដល់ទីក្រុងរ៉ូម ប្រទេសអ៊ីតាលី កាលពីល្ងាចថ្ងៃសុក្រ ដើម្បីចូលរួមពិធីបុណ្យព្រះសពរបស់សម្តេចប៉ាប ហ្វ្រង់ស៊ីស លោក Trump បាននិយាយថា វាជា «ថ្ងៃដ៏ល្អសម្រាប់កិច្ចពិភាក្សា និងកិច្ចប្រជុំជាមួយរុស្ស៊ី និងអ៊ុយក្រែន។ លោក បានបង្ហោះនៅលើវេទិកាសង្គម Truth Social របស់លោកថា វាខិតកាន់តែជិតដល់កិច្ចព្រមព្រៀងមួយ ហើយភាគីទាំងពីរគួរតែជួបគ្នាក្នុងកម្រិតខ្ពស់បំផុត ដើម្បី «បញ្ចប់» ។

លោក Trump ដែលបានគំរាមដើរចេញពីកិច្ចខិតខំប្រឹងប្រែងសន្តិភាព ប្រសិនបើលោកមើលមិនឃើញមានវឌ្ឍនភាពឆ្ពោះទៅរកបទឈប់បាញ់ បាននិយាយថា ចំណុចធំៗភាគច្រើនត្រូវបានគេព្រមព្រៀង។ ទោះយ៉ាងណា ជំនួយការរបស់វិមានក្រឹមឡាំង លោក Yuri Ushakov បាននិយាយថា លោក Witkoff និង លោក Putin មានការសន្ទនា «ស្ថាបនា» រួមទាំង «ការពិភាក្សាអំពីលទ្ធភាពនៃការបន្តការចរចាដោយផ្ទាល់» រវាងទីក្រុងគីវ និងទីក្រុងមូស្គូ។​