កងកម្លាំងឥណ្ឌា និងប៉ាគីស្ថាន បានបាញ់ប្រហារដាក់គ្នាទៅវិញទៅមកនៅតាមខ្សែបន្ទាត់គ្រប់គ្រងព្រំដែន (LOC) ដែលបំបែកប្រទេសទាំងពីរ ខណៈអង្គការសហប្រជាជាតិអំពាវនាវឱ្យមានការអត់ធ្មត់ជាអតិបរមា ស្របពេលមានការព្រមានអំពីការកើនឡើងយោធាកាន់តែធ្ងន់ធ្ងរថែមទៀត បន្ទាប់ពីការវាយប្រហារដ៏សាហាវចុងក្រោយ នៅទីក្រុង Pahalgam ក្នុងតំបន់កាស្មៀររបស់ឥណ្ឌា។

តំបន់កាស្មៀរ ត្រូវបានខណ្ឌចែករវាងឥណ្ឌា និងប៉ាគីស្ថាន ចាប់តាំងពីឯករាជ្យរបស់ខ្លួនកាលពីឆ្នាំ១៩៤៧ ដោយប្រទេសទាំងពីរបានទាមទារទឹកដីទាំងស្រុង ប៉ុន្តែគ្រប់គ្រងផ្នែកដាច់ដោយឡែកពីគ្នា ដែលនាំឱ្យភាពតានតឹងបន្តកើតមានឈានដល់អំពើហិង្សាជាច្រើនឆ្នាំមកនេះ។

ប្រភពកងទ័ពឥណ្ឌាបានប្រាប់សារព័ត៌មាន Al Jazeera កាលពីថ្ងៃសុក្រសប្ដាហ៍នេះថាភាគីប៉ាគីស្ថានបានចាប់ផ្តើមការបាញ់ប្រហារនេះ។ មន្ត្រីរដ្ឋាភិបាលម្នាក់នៅតំបន់កាស្មៀរដែលគ្រប់គ្រងដោយប៉ាគីស្ថាន ក៏បានបញ្ជាក់ប្រាប់ទីភ្នាក់ងារសារព័ត៌មាន AFP កាលពីថ្ងៃសុក្រផងដែរថា ទាហានបានបាញ់តបតគ្នា ប៉ុន្តែពុំបាននិយាយថាភាគីខាងណាជាអ្នកចាប់ផ្តើមបាញ់តបតគ្នាមុននោះទេ។

គួររម្លឹកថា ក្រុមឧទ្ទាមសង្ស័យបានសម្លាប់មនុស្សយ៉ាងហោចណាស់ ២៦ នាក់កាលពីថ្ងៃអង្គារសប្ដាហ៍នេះនៅក្នុងរមណីយដ្ឋានទេសចរណ៍ដ៏ស្រស់ស្អាតនៃទីប្រជុំជន Pahalgam ក្នុងការវាយប្រហារសម្លាប់មនុស្សរង្គាលមិនធ្លាប់មាន ក្នុងរយៈពេល២៥ឆ្នាំ នៅតំបន់កាស្មៀរគ្រប់គ្រងដោយឥណ្ឌា។ សេចក្តីថ្លែងការណ៍មួយត្រូវបានចេញផ្សាយក្រោមឈ្មោះថា រណសិរ្សតស៊ូ ដែលត្រូវគេជឿថាជាការវាយប្រហាររបស់ក្រុមប្រដាប់អាវុធ Lashkar-e-Taiba មានមូលដ្ឋាននៅប្រទេសប៉ាគីស្ថាន បានអះអាងទទួលខុសត្រូវចំពោះការវាយប្រហារនេះ៕