បន្ទាយមានជ័យ៖ ថ្នាក់ដឹកនាំខេត្តបន្ទាយមានជ័យដឹកនាំដោយឯកឧត្ដម អ៊ុំ រាត្រី អភិបាលខេត្ត និងឯកឧត្តម យុត ស្វិនី សមាជិក ក្រុម ប្រឹក្សា ខេត្ត តំណាង ឯកឧត្ដម ប្លែក វ៉ារី ប្រធាន ក្រុមប្រឹក្សា ខេត្ត ទទួលបដិសណ្ឋារកិច្ច លោកជំទាវ Flerida Ann Camille P.Mayo ឯកអគ្គរដ្ឋទូតនៃសាធារណរដ្ឋ​ហ្វីលីពីន​ប្រចាំព្រះរាជាណាចក្រកម្ពុជា និងប្រតិភូអមដំណើរ អញ្ជើញ មកបំញេញបេសកកម្មក្នុងទឹកដីខេត្តបន្ទាយមានជ័យ ។

ក្នុងឱកាសនោះឯកឧត្ដម អ៊ុំ រាត្រី បានបង្ហាញអំពីសក្ដានុពលរបស់ខេត្ត នូវតំបន់សេដ្ឋកិច្ចពិសេសៗ​ដែលមានសក្តានុពលក្នុងក្រុងប៉ោយប៉ែត​ និងក្រុងសិរីសោភ័ណ។ ព្រមទាំង បានលើកឡើងអំពី​តំបន់ទេសចរណ៍វប្បធម៌ មានប្រាសាទបុរាណជាច្រើន ដូចជាប្រាសាទបន្ទាយឆ្មារ ដែលមានវ័យចំណាស់​នៅក្នុងខេត្តបន្ទាយមានជ័យ ព្រមទាំងមានទីតាំងប្រវត្តិសាស្ត្រជាច្រើន​ទៀតជូនដល់ឯកអគ្គរដ្ឋទូតនៃសាធារណរដ្ឋហ្វីលីពីន​ ប្រចាំព្រះរាជាណាចក្រកម្ពុជា។

ជាមួយគ្នានោះដែរលោកជំទាវ Flerida Ann Camille P.Mayo ឯកអគ្គរដ្ឋទូតនៃសាធារណរដ្ឋហ្វីលីពីន ប្រចាំព្រះរាជាណាចក្រកម្ពុជា ក៏បានបង្ហាញចំណាប់អារម្មណ៍ថា ក្រោមការដឹកនាំ​របស់​ប្រមុខរដ្ឋាភិបាលកម្ពុជា ពីមួយអាណត្តិ ទៅមួយអាណត្តិ ពិសេសនៅក្នុងអាណត្តិទី៧ ក្រោមការ​ដឹកនាំ​ដោយសម្តេចមហាបវរអធិបតី ហ៊ុន ម៉ាណែត បានដឹកនាំប្រទេស កាន់តែមានការអភិវឌ្ឍ​លើគ្រប់វិស័យ ។

លោកជំទាវ ក៏បានរំឭកអំពីការចុះអនុស្សរណៈនៃការយោគយល់រវាងប្រទេសកម្ពុជា និងហ្វីលីពីន ខណៈដែលសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានអញ្ជើញទៅទស្សនកិច្ច​នៅ​ប្រទេសហ្វីលីពីន នាពេលកន្លងទៅថ្មីៗ នេះតាមរយៈ ​នៃទំនាក់ទំនងនេះលោកជំទាវ ក៏បង្ហាញ​ក្តី​សង្ឃឹមថា ថ្ងៃអនាគតប្រទេសកម្ពុជា ​និងហ្វីលីពីន​ កាន់តែមានទំនាក់ទំនងកាន់តែជិតស្និត អាចមាន​ការ​ផ្លាស់ប្តូរ​បច្ចេកទេស ​និងអ្នកស្រាវជ្រាវផ្នែកវប្បធម៌ ​ដើម្បីបង្កើនតម្លៃវប្បធម៌នៃប្រទេសទាំងពីរឱ្យ​កាន់តែល្អប្រសើរ​។លោកជំទាវ បានលើកឡើងថា ក្នុងនាមឯកអគ្គរដ្ឋទូតនៃសាធារណរដ្ឋហ្វីលីពីន ប្រចាំព្រះរាជាណាចក្រកម្ពុជា បានត្រៀមរួចរាល់ក្នុងការសហការក្នុងការចូលរួម​លើក​កម្ពស់​វិស័យវប្បធម៌របស់ប្រទេសកម្ពុជា ​ដោយលោកជំទាវ សង្កេតឃើញថា វិស័យវប្បធម៌​នៅប្រទេសកម្ពុជា បានដើរតួនាទីយ៉ាងសំខាន់ បញ្ជាក់ ពីអត្តសញ្ញាជាតិ។

ជាមួយគ្នានោះលោកជំទាវ ក៏បានសន្យានឹងជួយដល់កម្ពុជា​ ក្នុងសកម្មភាពបោសសម្អាតមីន លើផ្ទៃដីដែលនៅសេសសល់ក៏ដូចជានៅក្នុងខេត្តបន្ទាយមានជ័យផ្ទាល់ ។ហើយក្រៅពីសកម្មភាពនៃការបោសសម្អាតមីន ។ ឃិនសារិទ្ធ