ពោធិ៍សាត់៖ កោះទំហំជិត៤ហិកតា នៅវត្តបាកាន ស្ថិតក្នុងឃុំត្រពាំងជង ស្រុកបាកាន ត្រូវបានធ្វើពិធីបញ្ចុះបឋមសិលាកសាង និងអភិវឌ្ឍន៍ឲ្យក្លាយទៅជាឧទ្យានបាកាន កោះនៃការត្រាស់ដឹង។

ពិធីបញ្ចុះបឋមសិលានេះត្រូវបានធ្វើឡើងក្រោមអធិបតីភាព ឯកឧត្ដមបណ្ឌិត ទី នរិន្ទ រដ្ឋលេខាធិការប្រចាំការក្រសួងរ៉ែ និងថាមពល និងជាប្រធានក្រុមការងារគណបក្សប្រជាជនកម្ពុជាចុះជួយស្រុកបាកាន និងដោយមានការចូលរួមឯកឧត្ដម លោកជំទាវ ប្រធានក្រុមការងារឃុំទាំង៩ក្នុងស្រុកបាកាន អាជ្ញាធរស្រុកបាកាន និងបងប្អូនប្រជាពលរដ្ឋលោយាយលោតាយ៉ាងច្រើនកុះករ ។

ព្រះតេជគុណសុតន្តោ ឡាយ កន ព្រះគ្រូចៅអធិការវត្តបាកាន បានមានសង្ឃដីកា​រៀបរាប​អំពីប្រវត្តិនៃកោះទំហំជិត៤ហិកតានេះ​ គឺកើតឡើងពីការស្តារស្ទឹងពោធិ៍សាត់ចាស់ យកអាចម៍ ដីចាក់បំពេញកសាងកោះនេះឡើង ។

លោកយាយលោតា ដែលបានអញ្ជើញចូលរួម ក្នុងពិធីបញ្ចុះ​បឋមសិលាកសាង និង​អភិវឌ្ឍន៍​ឲ្យក្លាយទៅ​ជាឧទ្យានបាកាន កោះនៃការត្រាស់ដឹង បានបង្ហាញ់ក្តីរីករាយដោយស្រុកបាកាន​ទទួលបានសមិទ្ធផលថ្មី ។

ក្នុងឱកាសនោះឯកឧត្ដមបណ្ឌិត ទី នរិន្ទ មានប្រសាសន៍លើកឡើងថា កោះទំហំជិត៤ហិកតានេះ លេចចេញជារូបរាងដំបូងដោយ​ ព្រះតេជគុណសុតន្តោ ឡាយ កន ព្រះគ្រូចៅអធិការវត្តបាកាន និងគណៈកម្មការអាចារ្យវត្ត ​ហើយដោយទីតាំងកោះនេះ ស្ទឹង និងវត្តបាកាន គឺជាទីតាំងមាន​ជាប់ពាក់ព័ន្ធទៅនិង ប្រវត្តិឈ្មោះខេត្តពោធិ៍សាត់ឯកឧត្ដម កែវ រតនៈ រដ្ឋមន្រ្តីក្រសួងរ៉ែ និងថាមពល និងជាប្រធានក្រុមការងារគណបក្សប្រជាជនកម្ពុជាចុះជួយខេត្តពោធិ៍សាត់ បានផ្តួចផ្តើម កសាង​បន្ថែម ​និងអភិវឌ្ឍន៍​ឲ្យក្លាយទៅជាឧទ្យានបាកាន ​កោះនៃការត្រាស់ដឹង ស្របតាម​តម្រូវការ​របស់ព្រះសង្ឃ និងប្រជាពលរដ្ឋ ក្នុងគោលបំណងបម្រើក្នុងផ្នែកសាសនា ក៏ដូចជាទីតាំងសម្រាប់​ប្រជាពលរដ្ឋ លំហែអារម្មណ៍ និងដើរហាត់ប្រាណជាដើម ។

ឯកឧត្ដម បានបន្ថែមថា ការកសាង និងអភិវឌ្ឍន៍​កោះនេះគឺមានការចូលរួមពីក្រុមការងារ​គណបក្ស​ប្រជាជនកម្ពុជាចុះជួយស្រុកបាកាន​ និងពីសប្បុរសជននានាផងដែរដោយបែងចែកជា៥ផ្នែកធំៗ គឺទី១ ការស្ថាបនាស្ពាន​បេតុងចូលកោះ ទី២ការស្ថាបនាផ្លូវដើរខ្វាត់ខ្វែងនៅលើកោះ​ដោយក្រាលថ្ម​ម៉ាបខ្មែរ ទី៣ការរៀបចំដាំដើមឈើសួនច្បារ និងរូបចម្លាក់ផ្សេងៗសរុបចំនួន៩តំបន់ ទី៤ការរៀបចំ​តាមច្រាំងជុំវិញកោះ និងទី៥ការស្ថាបនាក្លោងទ្វារ និងផ្លូវចូលកោះ ៕