ប្រព័ន្ធផ្សព្វផ្សាយរដ្ឋបាននិយាយនៅថ្ងៃសៅរ៍២៦ ខែមេសានេះ ថា ប្រទេសកូរ៉េខាងជើងបានបង្ហាញនាវាចម្បាំងថ្មីមួយដែលខ្លួនអះអាងថាជានាវាពិឃាតបំពាក់ដោយ "អាវុធដ៏មានឥទ្ធិពលបំផុត" នៅក្នុងពិធីបង្ហាញ ដែលចូលរួមដោយមេដឹកនាំលោកKim Jong Un ។

ការប្រកាសនេះធ្វើឡើងប្រហែលមួយខែបន្ទាប់ពីលោក Kim បានត្រួតពិនិត្យមើលការសាកល្បងយានដ្រូន អត្តឃាត និងឈ្លបយកការណ៍ថ្មីដែលប្រើបច្ចេកវិទ្យា AI ដោយបន្ថែមការព្រួយបារម្ភលើកិច្ចសហប្រតិបត្តិការយោធាកាន់តែស៊ីជម្រៅរបស់កូរ៉េខាងជើងជាមួយទីក្រុងមូស្គូ។

នាវាចម្បាំងដែលបានដាក់ឈ្មោះថា "Choe Hyon" តាមឈ្មោះរបស់អ្នកប្រយុទ្ធប្រឆាំងជប៉ុនរបស់កូរ៉េខាងជើងដែលបានស្លាប់ គឺជាប្រភេទនាវាពិឃាតទម្ងន់ ៥.០០០ តោន ដែលបានចំណាយពេលជាងមួយឆ្នាំក្នុងការសាងសង់ នេះបើយោងតាមទីភ្នាក់ងារសារព័ត៌មានកណ្តាលកូរ៉េផ្លូវការរបស់ទីក្រុងព្យុងយ៉ាង។

ដោយមើលឃើញពីទំហំរបស់នាវាចម្បាំងនោះ ក្រុមអ្នកជំនាញជឿថា នាវានេះអាចផ្ទុកបានទាំងមីស៊ីលបាញ់ពីនាវាទៅដី និងពីនាវាទៅអាកាស ដោយអ្នកជំនាញរបស់សារព័ត៌មាន NK Newsរបស់កូរ៉េខាងជើង រាយការណ៍ថា នាវានោះទំនងជាត្រូវបានបំពាក់ដោយមីស៊ីលនុយក្លេអ៊ែរតាកទិករយៈចម្ងាយខ្លី៕