ក្រសួងការបរទេសរបស់ទីក្រុងតេអេរ៉ង់បាននិយាយនៅថ្ងៃសៅរ៍នេះថា អ៊ីរ៉ង់បានផ្តល់តួនាទីជាអ្នកសម្របសម្រួលក្នុងជម្លោះរវាងឥណ្ឌា និងប៉ាគីស្ថាន បន្ទាប់ពីការវាយប្រហារនៅតំបន់កាស្មៀរ បានបង្កើនភាពតានតឹងរវាងប្រទេសជិតខាងអាស៊ីទាំងពីរ។

ក្រសួងការបរទេសបាននិយាយថា រដ្ឋមន្ត្រីការបរទេសអ៊ីរ៉ង់ លោក Abbas Araghchi បានប្រកាសពីការត្រៀមខ្លួនរបស់អ៊ីរ៉ង់ក្នុងការពង្រីកកិច្ចខិតខំប្រឹងប្រែងសុច្ឆន្ទៈរបស់ខ្លួនក្នុងការជួយកាត់បន្ថយភាពតានតឹង នៅក្នុងការហៅទូរស័ព្ទកាលពីថ្ងៃសុក្រ ជាមួយសមភាគីប៉ាគីស្ថានលោក Ishaq Dar ។

លោក Araghchi បាននិយាយនៅលើបណ្ដាញសង្គម X ថាប្រទេសរបស់លោក "ត្រៀមខ្លួនជាស្រេចក្នុងការប្រើប្រាស់ការិយាល័យល្អរបស់ខ្លួន" ដើម្បីដោះស្រាយជម្លោះនោះ។

ភាពជាប់គាំងក្នុងជម្លោះឥណ្ឌា-ប៉ាគីស្ថាន មានកម្រិតខ្ពស់ សម្រាប់ប្រទេសទាំងពីរដែលមានអាវុធនុយក្លេអ៊ែរដូចគ្នា។

កិច្ចខិតខំប្រឹងប្រែងសម្របសម្រួលរបស់អ៊ីរ៉ង់ ផ្តល់នូវផ្លូវដ៏មានសក្តានុពលមួយ ដើម្បីកាត់បន្ថយការកើនឡើងកម្ដៅនៃភានតានតឹងដាក់គ្នា និងបង្កើនសន្តិភាព ក៏ដូចជាជៀសវាងអស្ថិរភាពក្នុងតំបន់បន្ថែមទៀត។

ការចូលរួមរបស់ទីក្រុងតេអេរ៉ង់ក៏ឆ្លុះបញ្ចាំងពីការបន្តការប្តេជ្ញាចិត្តរបស់ខ្លួនចំពោះស្ថិរភាពក្នុងតំបន់ ហើយអាចមានផលប៉ះពាល់ភូមិសាស្ត្រនយោបាយសំខាន់ៗ ជាពិសេសនៅក្នុងទំនាក់ទំនងរបស់ខ្លួនជាមួយប៉ាគីស្ថាន និងឥណ្ឌា៕