អ្នកនាំពាក្យវិមានក្រឹមឡាំង លោក Dmitry Peskov កាលពីថ្ងៃសៅរ៍ (ទី២៦ ខែមេសា) បាននិយាយថា ប្រធានាធិបតីរុស្ស៊ី លោក Vladimir Putin បានបញ្ជាក់ពីការត្រៀមខ្លួនរបស់រុស្ស៊ី ក្នុងការចរចាជាមួយអ៊ុយក្រែនដោយគ្មានលក្ខខណ្ឌជាមុន ក្នុងអំឡុងកិច្ចពិភាក្សាជាមួយលោក Steve Witkoff ដែលជាបេសកជនពិសេសរបស់ប្រធានាធិបតីអាមេរិក លោក Donald Trump ។

លោក Peskov បាននិយាយថា អំឡុងកិច្ចពិភាក្សាជាមួយបេសកជនរបស់លោក Trump គឺលោក Witkoff កលាពីថ្ងៃសុក្រ (ទី២៥ ខែមេសា) លោក Putin បានរំលឹកឡើងវិញថា ប្រទេសរុស្ស៊ីបានត្រៀមខ្លួនរួចជាស្រេច ក្នុងការចាប់ផ្ដើមការចរចាឡើងវិញជាមួយអ៊ុយក្រែនដោយគ្មានលក្ខខណ្ឌជាមុនណាមួយឡើយ ដោយលោកបានបន្ថែមថា លោកប្រធានាធិបតីបានបញ្ជាក់អំពីរឿងនេះម្តងហើយម្តងទៀត។

កន្លងមក ប្រធានាធិបតីរុស្ស៊ី តែងតែបានកំណត់ការទាមទាររបស់លោក ទាក់ទងនឹងអ៊ុយក្រែន ដែលរួមមានការគ្រប់គ្រងតំបន់អ៊ុយក្រែនទាំង៥ ដែលទីក្រុងមូស្គូអះអាងថា បានបញ្ចូលជាដែនដីឧបសម្ព័ន្ធ ការលះបង់ការប៉ុនប៉ងរបស់អ៊ុយក្រែន ក្នុងការចូលជាសមាជិករបស់អង្គការណាតូ និងការគ្មានកងកម្លាំងយោធា។

នៅថ្ងៃសុក្រនោះ ជំនួយការប្រធានាធិបតីរុស្ស៊ី លោក Yuri Ushakov បាននិយាយថា លោក Putin និងលោក Witkoff បានពិភាក្សាគ្នាអំពីលទ្ធភាពនៃកិច្ចចរចា រវាងរុស្ស៊ី និងអ៊ុយក្រែនដោយផ្ទាល់ ក្នុងអំឡុងកិច្ចប្រជុំរបស់ពួកលោក នៅទីក្រុងមូស្គូ។

គួរបញ្ជាក់ថា នេះគឺជាជុំទី៤ នៃកិច្ចពិភាក្សា រវាងលោក Putin និងលោក Witkoff ក្នុងឆ្នាំនេះ ដែលមានរយៈពេល ៣ម៉ោងដោយមានការចូលរួមពីលោក Ushakov និងលោក Kirill Dmitriev ប្រធានមូលនិធិវិនិយោគផ្ទាល់របស់រុស្ស៊ី និងជាបេសកជនពិសេសប្រធានាធិបតីរុស្ស៊ី សម្រាប់កិច្ចសហប្រតិបត្តិការសេដ្ឋកិច្ចជាមួយបរទេស៕