យោងតាមប្រភពសន្តិសុខអេហ្ស៊ីប បានឲ្យដឹងថា កាលពីថ្ងៃសៅរ៍ (ទី២៦ ខែមេសា) នៅទីក្រុងគែរ គណៈប្រតិភូក្រុមហាម៉ាសដឹកនាំដោយមេដឹកនាំជាន់ខ្ពស់ លោក Khalil al-Hayya បានយល់ព្រមដោះលែងចំណាប់ថ្នូរអ៊ីស្រាអែលទាំងអស់ ជាថ្នូរនឹងបទឈប់បាញ់រយៈពេល ៥ឆ្នាំ។

ប្រភពបានពណ៌នាកិច្ចពិភាក្សាកាលពីថ្ងៃសៅរ៍នោះថា «មានសារៈសំខាន់ខ្លាំងណាស់» ក្នុងការជំរុញដល់កិច្ចប្រឹងប្រែង ដើម្បីបញ្ចប់សង្រ្គាមនៅហ្គាហ្សា ដោយកត់សម្គាល់ថា គណៈប្រតិភូហាម៉ាសបានទទួលយកសំណើបទឈប់បាញ់រយៈពេល ៥ឆ្នាំ បន្ទាប់ពីបានពិនិត្យមើលការផ្តល់ជូនផ្សេងៗ។

ប្រភពបានបន្ថែមថា រហូតមកដល់ពេលនេះ អ៊ីស្រាអែលមិនទាន់បានឆ្លើយតបជាផ្លូវការនៅឡើយទេ ចំពោះសំណើនោះ ប៉ុន្តែបានផ្តល់ភ្លើងខៀវ ដើម្បីឲ្យបន្តកាចរចានានា ទាក់ទងនឹងការដោះលែងចំណាប់ថ្នូរ។

ជាមួយគ្នានេះ បណ្តាញទូរទស្សន៍ Al-Qahera News របស់អេហ្ស៊ីប បានរាយការណ៍ថា គណៈប្រតិភូក្រុមហាម៉ាស ក៏នឹងពិភាក្សាផងដែរ អំពីកិច្ចព្រមព្រៀងដ៏ទូលំទូលាយដែលធានាឲ្យបាននូវការដកទ័ពអ៊ីស្រាអែលទាំងស្រុងចេញពីតំបន់ហ្កាហ្សា និងធានាដល់ការបញ្ចូនជំនួយមនុស្សធម៌ទៅកាន់ដែនដីនេះ។ កិច្ចពិភាក្សាត្រូវបានគេរំពឹងថា នឹងរួមបញ្ចូលនូវការបង្កើតគណៈកម្មាធិការ ដើម្បីគ្រប់គ្រងរដ្ឋបាលរបស់តំបន់ហ្កាហ្សា។

គួរបញ្ជាក់ថា អ៊ីស្រាអែលបានបញ្ឈប់ការហូរចូលនៃការផ្គត់ផ្គង់ជំនួយទៅកាន់តំបន់ហ្កាហ្សា កាលពីថ្ងៃទី២ ខែមីនា បន្ទាប់ពីការផុតកំណត់នៃដំណាក់កាល ៦សប្តាហ៍ដំបូងនៃកិច្ចព្រមព្រៀងឈប់បាញ់ជាមួយក្រុមហាម៉ាសដែលបានចាប់ផ្តើមនៅថ្ងៃទី១៩ ខែមករា។ អ៊ីស្រាអែលបានអះអាងថា ចំណាត់ការនេះ គឺដោយសារតែការបដិសេធរបស់ក្រុមហាម៉ាស ចំពោះការផ្តល់ជូនរបស់ខ្លួន ក្នុងការពង្រីកបន្ថែមដំណាក់កាលទី១ នៃបទឈប់បាញ់។ បន្ទាប់មកកងកម្លាំងអ៊ីស្រាអែលបានចាប់ផ្តើមការវាយប្រហារឡើងវិញ នៅទូទាំងតំបន់ហ្គាហ្សា នាថ្ងៃទី១៨ ខែមីនា ដោយបញ្ចប់នូវបទឈប់បាញ់នោះ៕