ប្រទេសអ៊ីរ៉ង់ និងសហរដ្ឋអាមេរិកបានបើកការចរចាស៊ីជម្រៅ នៅក្នុងប្រទេសអូម៉ង់ ជុំវិញកម្មវិធីនុយក្លេអ៊ែរដែលកំពុងវិវត្តទៅមុខយ៉ាងឆាប់រហ័សរបស់ទីក្រុងតេអេរ៉ង់ កាលពីថ្ងៃសៅរ៍ (ទី២៦ ខែមេសា) ដោយបញ្ចប់ការពិភាក្សាជាមួយនឹងការសន្យាឲ្យមានកិច្ចពិភាក្សាបន្ថែមទៀត និងប្រហែលជាកិច្ចប្រជុំកម្រិតខ្ពស់មួយផ្សេងទៀត នៅចុងសប្តាហ៍ក្រោយ។

កិច្ចពិភាក្សានេះបានដំណើរការអស់រយៈពេលជាច្រើនម៉ោង នៅក្នុងទីក្រុង Muscat ជារាជធានីដែលហ៊ុមព័ទ្ធទៅដោយភ្នំ នៅជ្រុងខាងកើតនៃឧបទ្វីបអារ៉ាប់។

រដ្ឋមន្ត្រីការបរទេសអ៊ីរ៉ង់ លោក Abbas Araghchi បានប្រាប់ទូរទស្សន៍រដ្ឋក្រោយកិច្ចពិភាក្សានេះថា ភាគីពាក់ព័ន្ធ បានផ្លាស់ប្តូរប្រធានបទជាលាយលក្ខណ៍អក្សរ ពេញមួយថ្ងៃនៅក្នុងការពិភាក្សាដែលលោកបានពិពណ៌នាថា ជា «ការមានភាពប្រកដប្រជាច្បាស់លាស់ និងផ្តោតលើការងារ»។

លោក Araghchi បាននិយាយថា៖ «លើកនេះ ការចរចាមានភាពប្រកដប្រជាច្បាស់លាស់ជាងពេលមុន ហើយយើងបានចូលទៅដល់ការពិភាក្សាកាន់តែស៊ីជម្រៅ និងលម្អិតជាបណ្តើរៗ។ យើងបានទៅឆ្ងាយមួយកម្រិតពីការពិភាក្សាទូលំទូលាយ និងទូទៅ បើទោះបីជាករណីខ្វែងគំនិតគ្នា មិនទាន់ត្រូវបានដោះស្រាយក៏ដោយ។ ការយល់ឃើញខុសគ្នា នៅតែមាន ទាំងលើបញ្ហាធំៗ និងព័ត៌មានលម្អិត»។

ចំណែកមន្ត្រីរដ្ឋបាលជាន់ខ្ពស់របស់សហរដ្ឋអាមេរិក បាននិយាយថា កិច្ចពិភាក្សានេះ មាន «ភាពវិជ្ជមាន និងប្រកបដោយផលិតភាព»។ ដោយនិយាយក្នុងលក្ខខណ្ឌមិនបញ្ចេញឈ្មោះ ពាក់ព័ន្ធនឹងកិច្ចពិភាក្សានេះ មន្ត្រីរូបនេះបានប្រាប់ថា៖ «ជុំចុងក្រោយនៃការពិភាក្សាដោយផ្ទាល់ និងដោយប្រយោលនេះ មានរយៈពេលជាង ៤ម៉ោង។ នៅមានរឿងជាច្រើនទៀតដែលត្រូវធ្វើ ប៉ុន្តែមានវឌ្ឍនភាពបន្ថែមទៀត ជុំវិញការឈានដល់កិច្ចព្រមព្រៀង។ យើងបានយល់ព្រមជួបគ្នាម្តងទៀត ក្នុងពេលឆាប់ៗនេះ នៅអឺរ៉ុប ហើយយើងសូមអរគុណដៃគូអូម៉ង់របស់យើង សម្រាប់ជួយការសម្របសម្រួលកិច្ចពិភាក្សាទាំងនេះ»៕