​បាល់ទាត់៖ ​ក្រុម​ឥណ្ឌូនេស៊ី​បានធ្វើការ​ហ្វឹកហាត់​ជុំគ្នា​នៅ​ថ្ងៃ​អង្គារ​ម្សិលមិញ​នេះ ត្រៀមលក្ខណៈ​សំរាប់​ការប្រកួត​ដំបូង​របស់​ខ្លួន​នៅ​ក្នុង​ពូ​ល B ស្អែក​នេះ​ដោយ​ជួប​ជាមួយ​ក្រុម​គោព្រៃ​កម្ពុជា​។ ​​មុន​មកដល់​ព្រឹត្តិការណ៍​បាល់ទាត់​ធំ​ជាង​ប្រចាំ​តំបន់​អាស៊ាន​មួយ​នេះ គ្រូបង្វឹក​ឥណ្ឌូនេស៊ី​លោក Shin Tae-yong ដែល​ធ្លាប់ជា​គ្រូបង្វឹក​ក្រុម​ជំរើសជាតិ​កូរ៉េខាងត្បូង​នោះ បានដាក់​គោលដៅ​នាំ​ក្រុម​ឈ្នះ​ជើងឯក AFF Championship នេះ​ឱ្យបាន​ក្រោយ​ខកខាន​ចាញ់​នៅ​វគ្គ​ផ្តាច់ព្រ័ត្រ​ដល់​ទៅ ៥លើក​ក្នុង​អតីតកាល​។

​​ឥណ្ឌូនេស៊ី​បាន​ឈានឡើង​វគ្គ​ផ្តាច់ព្រ័ត្រ​ជើងឯក​អាស៊ាន​នេះ​ដល់​ទៅ ៥លើក​តែ​មិនដែល​ឈ្នះ​ជើងឯក​ឡើយ​ដែល​រួម​មាននៅ​ឆ្នាំ២០០០, ២០០២, ២០០៤, ២០១០ និង ២០១៦​។ ​​ឆ្នាំនេះ​ឥណ្ឌូនេស៊ី​បាន​កោះហៅ​កីឡាករ​សំខាន់ៗ​ ដែល​ប្រកប​អាជីព​នៅក្រៅ​ស្រុកជាពិសេស​កីឡាករ​កូនកាត់​បី​សាសន៍​វ័យ ១៩ឆ្នាំ Elkan Baggott ដែល​កំពុង​ប្រកប​អាជីព​នៅ​ក្លិប​​អង់គ្លេស Ipswich Town ក៏ដូចជា​កីឡាករ​ខ្សែប្រយុទ្ធ Egy Maulana Vikri ដែល​កំពុង​ប្រកប​អាជីព​នៅ​ក្លិប​​ស្លូ​វ៉ា​គី FK Senica ជាដើម​។ ​​ចំណែក​ក្រុម​កម្ពុជា​បានចាប់ផ្តើម​ប្រកួត​នៅក្នុង​ពូ​ល B នេះ​មុន​ឥណ្ឌូនេស៊ី​មួយ​ប្រកួត​គឺ​ចាញ់​ម៉ាឡេស៊ី ៣-១ កាលពី​ថ្ងៃ​ចន្ទ ​ខណៈ​មួយ​ប្រកួត​ទៀត​ក្នុង​ពូ​ល B ដែល​លេង​ស្អែក​នេះ​គឺ​ម៉ាឡេស៊ី​ជួប​ឡាវ​៕

​អត្ថបទ​៖​នាង សុភា​វុ​ធ