លោក Jordan Bardella បានប្រាប់សារព័ត៌មាន Le Parisien ថា រូបលោកគ្រោងនឹងធ្វើជាបេក្ខជនតំណែងប្រធានាធិបតីរបស់គណបក្សស្តាំនិយមជ្រុល គឺបក្ស National Rally (NR) នៅឆ្នាំ២០២៧ ប្រសិនបើមេដឹកនាំគណបក្ស លោកស្រី Marine Le Pen នៅតែត្រូវបានរារាំងមិនឲ្យឈរឈ្មោះនោះ។

គួរបញ្ជាក់ថា លោកស្រី Le Pen វ័យ ៥៦ឆ្នាំដែលបានឈរឈ្មោះប្រជែងតំណែងប្រធានាធិបតីចំនួន ៣លើក ហើយជាអ្នកនាំមុខគេ សម្រាប់ការបោះឆ្នោតនោះ ត្រូវបានរារាំងមិនឲ្យស្វែងរកតំណែងសាធារណៈរយៈពេល ៥ឆ្នាំ បន្ទាប់ពីតុលាការបានរកឃើញថា លោកស្រី និងសមាជិកមួយចំនួននៃគណបក្សរបស់លោកស្រី មានទោស នៅក្នុងខែមីនា ពីបទប្រើប្រាស់ថវិកាមិនត្រឹមត្រូវ។

លោកស្រី Le Pen បានបដិសេធមិនបានធ្វើអ្វីខុសឡើយ ហើយបាននិយាយថា លោកស្រីនឹងប្តឹងឧទ្ធរណ៍ជំទាស់នឹងសេចក្តីសម្រេចនេះ ជាអ្វីដែលលោកស្រីបានលើកឡើងថា មានហេតុផលនយោបាយ និងមានគោលបំណងរារាំងការប៉ុនប៉ងប្រជែងតំណែងប្រធានាធិបតីរបស់លោកស្រី។

លោក Bardella ដែលជាប្រមុខគណបក្សវ័យ ២៩ឆ្នាំ និងជាសមាជិកសភាអឺរ៉ុប មិនមានជាប់ពាក់ព័ន្ធក្នុងសំណុំរឿងរបស់តុលាការនេះទេ។ នៅមុននេះ លោកបានចៀសវាងមិនផ្ដល់ភាពច្បាស់លាស់ អំពីថា តើលោកនឹងស្វែងរកតំណែងសាធារណៈខ្ពស់បំផុតរបស់ប្រទេស ជំនួសលោកស្រី Le Pen ដែរ ឬទេ។

តែទោះបីជាយ៉ាងណាក្ដី កាលពីល្ងាចថ្ងៃសៅរ៍ (ទី២៦ ខែមេសា) លោកបានប្រាប់សារព័ត៌មាន Le Parisien ថា៖ «វាមិនមានភាពស្រពិចស្រពិល អំពីការដែលថា លោកស្រី Marine Le Pen គឺជាបេក្ខជនរបស់ខ្ញុំ ហើយប្រសិនបើលោកស្រីត្រូវបានរារាំង នាពេលខាងមុខ ខ្ញុំគិតថា ខ្ញុំអាចនិយាយទៅកាន់អ្នកថា ខ្ញុំនឹងក្លាយជាបេក្ខជន។ ខ្ញុំមិនអាចផ្ដល់ភាពច្បាស់លាស់ជាងនេះទៀតទេ»។

លោកស្រី Le Pen និងមន្ត្រីបក្ស ត្រូវបានចោទប្រកាន់ថា បានប្រើប្រាស់មូលនិធិសហភាពអឺរ៉ុប ដើម្បីចំណាយ សម្រាប់បុគ្គលិករបស់បក្ស NR នៅប្រទេសបារាំង៕