យោធាសហរដ្ឋអាមេរិក បាននិយាយកាលពីថ្ងៃអាទិត្យថា ខ្លួននឹងមិនបង្ហាញព័ត៌មានលម្អិតជាក់លាក់អំពីការវាយប្រហារដោយយោធារបស់ខ្លួននៅក្នុងប្រទេសយេម៉ែនឡើយ ដោយលើកឡើងពីអ្វីដែលខ្លួនហៅថាជាតម្រូវការ «ដើម្បីការពារសន្តិសុខប្រតិបត្តិការ» ខណៈបាននិយាយថា ការវាយប្រហារមាន «ឥទ្ធិពលដ៍ខ្លាំងក្លា» លើក្រុមឧទ្ទាមហ៊ួទី។

ប្រធានាធិបតីគណបក្សសាធារណរដ្ឋ លោក Donald Trump បានបញ្ជាឱ្យបង្កើនការវាយប្រហាររបស់សហរដ្ឋអាមេរិកទៅលើប្រទេសយេម៉ែនកាលពីខែមុន ដោយរដ្ឋបាលរបស់លោកបាននិយាយថា នឹងបន្តវាយប្រហារទៅលើក្រុមឧទ្ទាមហ៊ួទីគាំទ្រដោយអ៊ីរ៉ង់ រហូតដល់ក្រុមនេះបញ្ឈប់ការវាយប្រហារលើការដឹកជញ្ជូនទំនិញនៅសមុទ្រក្រហម។

ការវាយប្រហារថ្មីៗរបស់អាមេរិក បានសម្លាប់មនុស្សរាប់សិបនាក់ រួមទាំងមនុស្ស៧៤នាក់នៅឯស្ថានីយប្រេងមួយកន្លែងកាលពីពាក់កណ្តាលខែមេសា ជាការវាយប្រហារដ៏បង្ហូរឈាមបំផុតនៅក្នុងប្រទេសយេម៉ែនក្រោមការបញ្ជារបស់លោក Trump។ ក្រុមអ្នកតស៊ូមតិសិទ្ធិមនុស្ស បានលើកឡើងពីការព្រួយបារម្ភអំពីការសម្លាប់ជនស៊ីវិល ហើយសមាជិកព្រឹទ្ធសភាគណបក្សប្រជាធិបតេយ្យបីរូប បានសរសេរសារទៅកាន់ប្រមុខមន្ទីរបញ្ចកោណលោក Pete Hegseth ដោយទាមទារឱ្យទទួលខុសត្រូវចំពោះការបាត់បង់ជីវិតជនស៊ីវិល។

ទីបញ្ជាការកណ្តាលរបស់អាមេរិកបាននិយាយនៅក្នុងសេចក្តីថ្លែងការណ៍ថា «ដើម្បីការពារសន្តិសុខប្រតិបត្តិការ យើងមានបំណងកំណត់ការបង្ហាញព័ត៌មានលម្អិតនៃប្រតិបត្តិការដែលកំពុងដំណើរការ ឬនៅពេលអនាគតរបស់យើង។ យើងមានការប្រុងប្រយ័ត្នក្នុងវិធីសាស្ត្រប្រតិបត្តិការ ប៉ុន្តែនឹងមិនបង្ហាញជាក់លាក់អំពីអ្វីដែលយើងបានធ្វើ និងអ្វីដែលយើងនឹងធ្វើនោះទេ។

យោធានិយាយថា ខ្លួនបានវាយប្រហារលើគោលដៅជាង៨០០គោលដៅ ចាប់តាំងពីពាក់កណ្តាលខែមីនា ដោយបានសម្លាប់អ្នកប្រយុទ្ធក្រុមហ៊ួទីរាប់រយនាក់ និងមេដឹកនាំក្រុមនេះជាច្រើននាក់ ព្រមទាំងបានបំផ្លាញទីតាំងជាច្រើនកន្លែងរបស់ក្រុមសកម្មប្រយុទ្ធ។