រដ្ឋបាលប្រឆាំងគ្រឿងញៀន DEA របស់សហរដ្ឋអាមេរិក បាននិយាយកាលពីថ្ងៃអាទិត្យ (២៧ មេសា) ថា ក្រុមភ្នាក់ងារអនុវត្តច្បាប់សហព័ន្ធបានចុះឆ្មក់ប្រតិបត្តិការនៅក្នុងក្លឹបរាត្រី Colorado Springs ដោយក្នុងនោះជនអន្តោប្រវេសន៍ជាង ១០០នាក់ ដែលរស់នៅក្នុងសហរដ្ឋអាមេរិកដោយខុសច្បាប់ ត្រូវបានចាប់ខ្លួន។

ប្រតិបត្តិការនេះគឺជាការឆ្មក់ចាប់ខ្លួនដ៏ធំបំផុតមួយ ចាប់តាំងពីលោកប្រធានាធិបតី Donald Trump ចូលកាន់តំណែងកាលពីថ្ងៃទី២០ ខែមករា មក។ លោក Trump បានប្តេជ្ញានិរទេសជនអន្តោប្រវេសន៍ដែលស្ថិតនៅក្នុងសហរដ្ឋអាមេរិកដោយខុសច្បាប់ ហើយបានធ្វើឱ្យរឿងនេះក្លាយជាចំណុចសំខាន់សម្រាប់តំណែងប្រធានាធិបតីរបស់លោក។

រដ្ឋបាល DEA និយាយថា មនុស្សសរុប ១១៤នាក់ ត្រូវចាប់ខ្លួន ហើយទំនងជាអាចត្រូវនិរទេស ដោយបន្ថែមថា ក្លឹបរាត្រីនេះមានមនុស្សជាង ២០០នាក់នៅខាងក្នុង ហើយអ្នកត្រូវចាប់ខ្លួន ១១៤នាក់គឺស្ថិតក្នុងចំណោមតួលេខនោះ ដោយសារពួកគេរស់នៅអាមេរិក ដោយខុសច្បាប់។

ទីភ្នាក់ងារអាមេរិកបានបង្កើនសកម្មភាពអនុវត្តច្បាប់របស់ខ្លួនកាន់តែខ្លាំង ចាប់តាំងពីលោក Trump ចូលកាន់តំណែងមក។ មួយថ្ងៃមុននេះ មន្ត្រីអនុវត្តច្បាប់អន្តោប្រវេសន៍ និងគយរបស់អាមេរិក បាននិយាយថា ទីភ្នាក់ងារ និងមន្ត្រីក្នុងរដ្ឋ Florida បានចាប់ខ្លួនមនុស្សជិត ៨០០នាក់ ដែលរស់នៅអាមេរិកដោយខុសច្បាប់ ក្នុងពេល ៤ថ្ងៃកន្លងទៅនោះ នៅក្នុងអ្វីដែលខ្លួនហៅថា "ការបង្រ្កាបដ៏ធំរបស់សមត្ថកិច្ចអន្តោប្រវេសន៍ និងពហុភ្នាក់ងារ"៕