ក្រុមហ៊ុនស្ទង់មតិ Ipsos MORI បាននិយាយកាលពីថ្ងៃអាទិត្យ (២៧ មេសា) ថា ទំនុកចិត្តក្នុងចំណោមប្រជាជនចក្រភពអង់គ្លេស អំពីសេដ្ឋកិច្ចក្នុងពេល ១២ខែខាងមុខ បានធ្លាក់ចុះខ្លាំងដល់កម្រិតទាបបំផុតនៅក្នុងកំណត់ត្រាជិត ៥០ឆ្នាំ។

Ipsos និយាយថា តួលេខ ៧៥% នៃប្រជាជនអង់គ្លេសរំពឹងថា សេដ្ឋកិច្ចនឹងកាន់តែអាក្រក់ខ្លាំងឡើងក្នុងពេល ១២ខែបន្ទាប់ ដែលកើនឡើង ៨% ចាប់តាំងពីខែមីនា។ ជនជាតិអង់គ្លេសត្រឹមតែ ៧% ប៉ុណ្ណោះដែលគិតថា សេដ្ឋកិច្ចនឹងប្រសើរឡើងនៅឆ្នាំក្រោយ ខណៈតួលេខ ១៣% គិតថានឹងនៅតែដដែល។ ទិន្នន័យទំនុកចិត្តមិនល្អលើសពីសមតុល្យ ៦៨% តំណាងឱ្យកម្រិតទាបបំផុតនៃសុទិដ្ឋិនិយម ចាប់តាំងពី Ipsos បានចាប់ផ្តើមប្រមូលទិន្នន័យក្នុងឆ្នាំ១៩៧៨ មក។

ស្ថាប័នស្ទង់មតិ Ipsos និយាយថា ទំនុកចិត្តបានធ្លាក់រួចទៅហើយក្នុងចំណោមអាជីវកម្ម និងអ្នកប្រើប្រាស់អង់គ្លេស ហើយការដំឡើងពន្ធ និងក្ដីបារម្ភថ្មីៗរបស់អាមេរិក លើស្ថានភាពសេដ្ឋកិច្ចចក្រភពអង់គ្លេស បានអូសទម្លាក់ទុទិដ្ឋិនិយមទៅកម្រិតទាបបំផុតមិនធ្លាប់ឃើញ ចាប់តាំងពីវិបត្តិសេដ្ឋកិច្ចឆ្នាំ១៩៨០ វិបត្តិហិរញ្ញវត្ថុឆ្នាំ២០០៨ និងវិបត្តិការចំណាយប្រចាំថ្ងៃដែលទាក់ទងនឹងជំងឺកូវីដ១៩មក។

ការរកឃើញនេះបានវាយប្រហារយ៉ាងខ្លាំងដល់រដ្ឋាភិបាលរបស់នាយករដ្ឋមន្រ្តីបក្សការងារ លោក Keir Starmer ដែលជាប់ឆ្នោតកាលពីខែកក្កដា ឆ្នាំមុន ជាមួយនឹងមហិច្ឆតាចង់ឱ្យចក្រភពអង់គ្លេស ក្លាយជាប្រទេសដែលមានសេដ្ឋកិច្ចលូតលាស់លឿនបំផុតនៅក្នុងក្រុមប្រទេសទាំងប្រាំពីរ ឬហៅថា G7៕