ប្រជាជនកាណាដា រាប់លាននាក់ត្រៀមខ្លួនទៅទម្លាក់សន្លឹកឆ្នោតនៅថ្ងៃចន្ទ ២៨ មេសា នេះ ដើម្បីសម្រេចចិត្តថា តើត្រូវគាំទ្រគណបក្សសេរីនិយម របស់លោកនាយករដ្ឋមន្ត្រី Mark Carney ឱ្យបន្តកាន់អំណាច ឬផ្ដល់ការគ្រប់គ្រងថ្មីទៅឱ្យពួកអភិរក្សនិយមរបស់មេដឹកនាំបក្សប្រឆាំង Pierre Poilievre នៅចំពោះមុខសង្គ្រាមពាណិជ្ជកម្មរបស់ប្រធានាធីបតីអាមេរិក Donald Trump រួមទាំងការវាយប្រហារដោយរថយន្តនាពេលថ្មីៗនេះលើក្រុង Vancouver។

ក្រោយបានឈ្នះអាណត្តិទីពីរ លោក Trump ចាប់ផ្តើមគំរាមកំហែងសេដ្ឋកិច្ច និងអធិបតេយ្យភាពរបស់កាណាដា ហើយក៏បាននិយាយពីការដាក់បញ្ចូលប្រទេសនេះឱ្យក្លាយជារដ្ឋទី៥១ របស់អាមេរិក នៅក្នុងអ្វីដែលក្រុមសេរីនិយម ជំទាស់យ៉ាងខ្លាំង។

ការស្ទង់មតិកាលពីថ្ងៃអាទិត្យ បាននិយាយថា គម្លាតរវាងបក្សនៃបេក្ខភាពនាំមុខទាំងពីរ មានប្រហែល ៤% ដោយការគាំទ្រជាតិលើក្រុមសេរីនិយមនៅ ៤៣% ធៀបនឹង ៣៨,៩% សម្រាប់ក្រុមអភិរក្សនិយម។ 

នៅថ្ងៃទី២៨ ខែមេសា ការិយាល័យបោះឆ្នោតនឹងបើកពីម៉ោងក្នុងស្រុក ៩ព្រឹកដល់ ៩យប់ ហើយពលរដ្ឋកាណាដាប្រមាណ ២៨,៩លាននាក់ មានសិទ្ធិបោះឆ្នោត ដោយមនុស្សជាង ៧លាននាក់ បានទៅបោះឆ្នោតមុនកំណត់រួចទៅហើយកាលពីសប្ដាហ៍មុន។ 

នៅក្នុងការបោះឆ្នោតសហព័ន្ធកាណាដា - ដូចនៅក្នុងការបោះឆ្នោតសកលរបស់ចក្រភពអង់គ្លេសដែរ - ពលរដ្ឋមិនបោះឆ្នោតរើសនាយករដ្ឋមន្រ្តីដោយផ្ទាល់ទេ។ ផ្ទុយទៅវិញ មេដឹកនាំនៃបក្សដែលទទួលបានអាសនៈសភាភាគច្រើន នឹងក្លាយជានាយករដ្ឋមន្ត្រីកាណាដា៕