មន្ត្រីសេដ្ឋកិច្ចជាន់ខ្ពស់របស់ចិននៅថ្ងៃចន្ទ ទី២៨ ខែមេសានេះ បាននិយាយថា ទីក្រុងប៉េកាំងស្ថិតនៅលើ «ផ្នែកដ៏ត្រឹមត្រូវនៃប្រវត្តិសាស្ត្រ» នៅក្នុងសង្គ្រាមពាណិជ្ជកម្មដ៏ក្តៅគគុករបស់ខ្លួនជាមួយសហរដ្ឋអាមេរិក។ ចាប់តាំងពីការវិលត្រឡប់ទៅកាន់តំណែងប្រធានាធិបតីក្នុងខែមករាមក ប្រធានាធិបតីអាមេរិក លោក Donald Trump បានដាក់ការដំឡើងពន្ធ១០ភាគរយលើដៃគូពាណិជ្ជកម្មភាគច្រើនរបស់សហរដ្ឋអាមេរិក និងពន្ធដាច់ដោយឡែក១៤៥ភាគរយលើផលិតផលភាគច្រើននាំចូលពីប្រទេសចិន។

ទីក្រុងប៉េកាំង បានឆ្លើយតបវិញដោយការដំឡើងពន្ធ១២៥ភាគរយរបស់ខ្លួនលើទំនិញរបស់អាមេរិក។ និយាយនៅទីក្រុងប៉េកាំងក្នុងសន្និសីទសារព័ត៌មាន ក្រុមមន្ត្រីបានប្តេជ្ញាថានឹងមានចំណាត់ការកាន់តែច្រើន ដើម្បីការពារសេដ្ឋកិច្ចរបស់ប្រទេសចិនពីផលប៉ះពាល់នៃការប្រឈមមុខដាក់គ្នានេះ ដែលអ្នករៀបចំផែនការសេដ្ឋកិច្ចជាន់ខ្ពស់ លោក Zhao Chenxin បាននិយាយថា ទីក្រុងប៉េកាំង ស្ថិតនៅលើ «ផ្នែកត្រឹមត្រូវនៃប្រវត្តិសាស្ត្រ»។ លោក Zhao និយាយថា «យើងជឿជាក់យ៉ាងមុតមាំថា ប្រសិនបើអ្នកប្រឆាំងនឹងពិភពលោកនិងការពិត នោះអ្នកនឹងនៅនឹងដាក់ខ្លួនឯងឲ្យនៅឯកោ»។

លោកនិយាយបន្ថែមថា «មានតែការធ្វើដំណើរជាមួយពិភពលោក និងដោយភាពត្រឹមត្រូវប៉ុណ្ណោះ ទើបយើងអាចទទួលបានអនាគតល្អប្រសើរ»។ លោកនិយាយថា សហរដ្ឋអាមេរិក «លេងសន្លឹកបៀរមិនច្បាស់លាស់ គំរាម និងដើរចេញពីការសន្យារបស់ខ្លួន» ដោយថ្កោលទោស «ឯកតោភាគីនិយម និងការគំរាមកំហែង» របស់ទីក្រុងវ៉ាស៊ីនតោន។

រដ្ឋមន្ត្រីក្រសួងរតនាគារសហរដ្ឋអាមេរិក លោក Scott Bessent កាលពីថ្ងៃអាទិត្យ បានការពារគោលនយោបាយដំឡើងពន្ធដ៏ច្របូកច្របល់របស់លោក Trump ដែលបានធ្វើឱ្យទីផ្សាររង្គោះរង្គើរ ជាមធ្យោបាយក្នុងការបង្កើត «ភាពមិនប្រាកដប្រជាជាយុទ្ធសាស្រ្ត» ដែលធ្វើឱ្យទីក្រុងវ៉ាស៊ីនតោនមានប្រៀប។ ប្រទេសរាប់សិប ប្រឈមការផុតកំណត់រយៈពេល៩០ថ្ងៃ នៅក្នុងខែកក្កដា ដើម្បីចុះកិច្ចព្រមព្រៀងជាមួយទីក្រុងវ៉ាស៊ីនតោន និងបញ្ចៀសអត្រាជាក់លាក់និងកាន់តែខ្ពស់របស់ប្រទេស។ ទោះជាយ៉ាងណា ទីក្រុងប៉េកាំង បានប្តេជ្ញាប្រយុទ្ធប្រឆាំងសង្រ្គាមពាណិជ្ជកម្មដល់ទីបញ្ចប់ និងបានច្រានចោលការអះអាងរបស់សហរដ្ឋអាមេរិកថា ខ្លួនកំពុងចរចាជាមួយទីក្រុងវ៉ាស៊ីនតោន។