រដ្ឋមន្ត្រីការបរទេសរុស្ស៊ីលោក សឺហ្គេ ឡាវរ៉ូវ (Sergey Lavrov) បាននិយាយនៅក្នុងបទសម្ភាសន៍ជាមួយសារព័ត៌មាន CBSថា ប្រទេសរុស្ស៊ីយល់ពី «ការខ្វះអំណត់»របស់ភាគីសហរដ្ឋអាមេរិក ទាក់ទងនឹងការដោះស្រាយជម្លោះអ៊ុយក្រែន ប៉ុន្តែវិធីសាស្រ្តបែបនេះ រារាំងដល់ការធ្វើ«នយោបាយពិតប្រាកដ»។

លោកបាននិយាយថា៖«យើងយល់ពីភាពមិនចេះអត់ធ្មត់។ ដោយសារតែនៅក្នុងវប្បធម៌អាមេរិក អ្នកបង្កើតការរំពឹងទុក ហើយអ្នកបញ្ឆេះភាពតានតឹងជុំវិញការរំពឹងទុកទាំងនោះ។ទង្វើបែបនេះ មិនជួយ ដល់ការធ្វើនយោបាយពិតប្រាកដទេ» ដោយបានធ្វើការអត្ថាធិប្បាយអំពីសេចក្តីថ្លែងការណ៍របស់រដ្ឋមន្ត្រីការបរទេសអាមេរិកលោក Marco Rubio អំពីតម្រូវការសម្រាប់ដំណោះស្រាយឆាប់ៗបំផុត នៅលើអ៊ុយក្រែន។

លោកបានពន្យល់ថា៖«ប៉ុន្តែក្នុងករណីរបស់យើង ដូចដែលខ្ញុំបាននិយាយហើយ យើងតែងតែត្រៀមខ្លួនសម្រាប់ការសន្ទនា ត្រៀមខ្លួនសម្រាប់ការចរចា យើងនឹងមិនចាប់ផ្តើមដោយការរំពឹងលើការបរាជ័យនោះទេ។ នេះនឹងជាលក្ខណៈនៃអ្នកជំនាញចរចាមិនល្អ ហើយក៏ជាអ្នកជំនាញចរចាគ្មានបទពិសោធ។

នៅពេលត្រូវបានសួរថាតើរុស្ស៊ី និងសហរដ្ឋអាមេរិក នឹងបន្តកិច្ចសន្ទនា ប្រសិនបើកិច្ចចរចាសន្តិភាពដ៏មានសក្តានុពលជាមួយអ៊ុយក្រែន បរាជ័យនោះ លោកបានបញ្ជាក់ថា សំណួរនេះ គួរតែត្រូវបានសួរទៅកាន់រដ្ឋបាលសហរដ្ឋអាមេរិក។ លោកបានបន្ថែមថា៖«អ្នកវិនិច្ឆ័យទុកមុននូវដំណើរការបច្ចុប្បន្ននេះ ដោយនិយាយថា កិច្ចពិភាក្សានេះ បរាជ័យ។ អ្នកដឹងហើយថា យើងផ្តោតទៅលើការធ្វើកិច្ចការ មិនមែនផ្តោតលើការគិតអំពីការបរាជ័យ ឬជ័យជម្នះអ្វីនោះទេ។ លុះត្រាតែអ្នកផ្តោតទៅលើការពិត នោះគឺជាអ្វីដែលយើងធ្វើ។ អ្នកត្រូវតែមានភាពហ្មត់ចត់ទៅលើ ដែលអ្នកកំពុងធ្វើនោះ»។