ជប៉ុន និងវៀតណាម បានឯកភាពគ្នា ពង្រឹងពាណិជ្ជកម្មទេ្វភាគី និងរក្សាច្បាប់សកលលើលំហូរសេរីរបស់ទំនិញ ស្របពេលនាយរដ្ឋមន្រ្តីជប៉ុនលោក Shigeru Ishiba ជួបជាមួយនាយករដ្ឋមន្រ្តីវៀតណាមលោក Phạm Minh Chính នៅទីក្រុងហាណូយ នាថ្ងៃចន្ទនេះ ។

ដំណើរទស្សនកិច្ចលើកដំបូងរបស់លោក Ishiba មកកាន់វៀតណាម និងដំណើរទស្សនកិច្ចបន្ទាប់របស់លោកទៅកាន់ប្រទេសហ្វីលីពីននៅថ្ងៃអង្គារស្អែក ក្លាយជាជំនួបអាស៊ីបូព៌ាកម្រិតខ្ពស់ចុងក្រោយ ស្របពេលភាពពុំច្បាស់លាស់សកលកើនឡើង បង្កឡើងដោយសារការគំរាមកំហែងដំឡើងពន្ធរបស់សហរដ្ឋអាមេរិក ។

នៅដើមខែមេសានេះ សហរដ្ឋអាមេរិកបានដំឡើងពន្ធ ៤៦ភាគរយលើវៀតណាម និង ២៤ភាគរយលើប្រទេសជប៉ុន ។ ក្រោយមក កាតព្វពន្ធទាំងនោះត្រូវបានផ្អាករហូតដល់ខែកក្កដា ខណៈកិច្ចប្រជុំទ្វេភាគីធ្វើឡើង ប៉ុន្តែការទារពន្ធ ១០ភាគរយ នឹងដាក់លើការនាំចូលទាំងអស់ទៅកាន់សហរដ្ឋអាមេរិក ដែលជាទីផ្សារសំខាន់សម្រាប់ប្រទេសទាំង ២ ។ ជប៉ុន និងវៀតណាម បានចូលរួមកិច្ចប្រជុំជាមួយទីក្រុងវ៉ាស៊ីនតោន ដើម្បីបញ្ចៀសការដំឡើងពន្ធនេះ ។

ដោយឡែក ប្រធានាធិបតីវៀតណាមលោក To Lam បានជំរុញឲ្យជប៉ុនបង្កើនការវិនិយោគលើគម្រោងហេដ្ឋារចនាសម្ព័ន្ធ ក្រោយលោកជួបជាមួយលោក Ishiba កាលពីថ្ងៃអាទិត្យ ។

យោងតាមការអះអាងរបស់ក្រសួងហិរញ្ញវត្ថុវៀតណាម បានឲ្យដឹងថា វៀតណាមគឺជាមជ្ឈមណ្ឌលប្រមូលផ្តុំដ៏សំខាន់មួយ សម្រាប់ក្រុមហ៊ុនផលិតកម្មធំៗបំផុតរបស់ជប៉ុន រួមទាំងក្រុមហ៊ុន Honda, Canon និងក្រុមហ៊ុន Panasonic ក្នុងនោះទឹកប្រាក់សរុប ៧៨ពាន់លានដុល្លារ ត្រូវបានវិនិយោគនៅក្នុងប្រទេសនៅអាស៊ីអាគ្នេយ៍មួយនេះ ដោយក្រុមហ៊ុនជប៉ុន ៕