​បាល់ទាត់៖ ​ក្រុម​ម្ចាស់ផ្ទះ​រៀបចំ​ព្រឹត្តិការណ៍​បាល់ទាត់​ជើងឯក​តំបន់​អាស៊ាន AFF Championship 2020 សិង្ហ​បុរី​កំពុង​សម្លឹង​ឃើញ​ ៣ពិន្ទុបន្ថែម​នៅពេល​ជួប​ជាមួយ​ហ្វីលីពីន​ក្នុងជំនួប​ទី២ ក្នុង​ពូ​ល A ល្ងាច​នេះ​។ ​​សិង្ហ​បុរី​បានចាប់ផ្តើម​ការប្រកួត​ដំបូង​របស់ខ្លួន​ជាមួយនឹង​ជ័យជំនះ ៣-០ លើ​មី​យ៉ាន់​ម៉ា​កាលពី​ថ្ងៃអាទិត្យ​។​

​​ការប្រកួត​ល្ងាច​ថ្ងៃ​ពុធ​នេះ​នឹង​ជាការ​ប្រកួត​ដំបូង​របស់​ហ្វីលីពីន​នៅក្នុង​ពូ​ល A នេះ​តែ​ក្រុម​ហ្វីលីពីន​អវត្តមាន​កីឡាករ​មួយចំនួន​។ ​​គ្រូបង្វឹក​ហ្វីលីពីន​លោក Stewart Hall បាន​បញ្ជាក់ថា​ ខ្សែការពារ Jefferson Tabinas ដែល​ប្រកប​អាជីព​នៅ​ទឹកដី​ជប៉ុន​នោះ​នឹង​មិនមាន​វត្តមាន​ឡើយ ហើយ​កីឡាករ​ផ្សេងទៀត​ក៏​នឹង​អវត្តមាន​ផងដែរ​ ដូចជា​ខ្សែបម្រើ​កូនកាត់​អូស្ត្រាលី-ហ្វីលីពីន Iain Ramsey មក​មិនទាន់​ការប្រកួត​ទី១ របស់​ហ្វីលីពីន​ផងដែរ​។ ​​ជ័យជំនះ​សំរាប់​ក្រុម​សិង្ហ​បុរី​ល្ងាច​នេះ អាច​នឹង​ធ្វើឱ្យ​ពួកគេ​កក់​កៅអី​នៅ​វគ្គ​បន្តបាន​ផងដែរ ​តែ​ហ្វីលីពីន​ជា​ក្រុម​ដែលមាន​បទពិសោធ​ខ្ពស់​មួយ​ផងដែរ​នៅពាន​ក្នុង​តំបន់​មួយ​នេះ​។

​​៥ព្រឹត្តិការណ៍​ចុងក្រោយ​នៃ​ពាន AFF Championship នេះ​ហ្វីលីពីន​បាន​ឡើង​វគ្គ​ពាក់កណ្តាល​ផ្តាច់ព្រ័ត្រ​ដល់​ទៅ​ ៤​លើក ខណៈ​សិង្ហ​បុរីខកខាន​ឡើង​មិន​ផុត​វគ្គ​វិលជុំ​ក្នុង​ពូ​ល ៣ព្រឹត្តិការណ៍​ចុងក្រោយ​មកហើយ​។ ​​មួយ​ប្រកួត​ទៀត​ក្នុង​ពូ​ល A នេះ​ដែល​ប្រកួត​គ្នា​រសៀល​នេះ​គឺ​មី​យ៉ាន់​ម៉ា​ជួប​ជាមួយ​ទី​ម័​រ​ឡេ​ស្តេ​៕

​អត្ថបទ​៖​នាង សុភា​វុ​ធ