បណ្ដាថ្នាក់ដឹកនាំហិរញ្ញវត្ថុទូទាំងពិភពលោក បានធ្វើដំណើរទៅទីក្រុងវ៉ាស៊ីនតោន កាលពីសប្តាហ៍មុន ដើម្បីស្វែងរកភាពច្បាស់លាស់ អំពីអ្វីដែលវានឹងត្រូវការជាចាំបាច់ ដើម្បីឲ្យធូរស្រាលបានខ្លះពីភាពច្របូកច្របល់ ដោយសារវិធានការពន្ធដ៏ស្មុគស្មាញរបស់លោកប្រធានាធិបតី Donald Trump និងអំពីផលប៉ះពាល់លើសេដ្ឋកិច្ចសកល។

តែភាគច្រើននៃអ្នកដឹកនាំទាំងនោះ បានវិលទៅប្រទេសវិញជាមួយនឹងភាពស្រពេចស្រពិល ជាជាងទទួលបានចម្លើយ។ អ្នកចូលរួមជាច្រើន នៅក្នុងកិច្ចប្រជុំនិទាឃរដូវរបស់មូលនិធិរូបិយវត្ថុអន្តរជាតិ និងធនាគារពិភពលោក (IMF-WB Spring Meetings) យល់ឃើញថា រដ្ឋបាលរបស់លោក Trump នៅតែមិនទាន់ច្បាស់លាស់ សម្រាប់ការទាមទាររបស់ខ្លួនពីដៃគូពាណិជ្ជកម្មដែលរងគ្រោះដោយអត្រាពន្ធដ៏ធ្ងន់ធ្ងរ។

អំឡុងសប្តាហ៍ពេញទៅដោយភាពច្របូកច្របល់ រដ្ឋមន្ត្រីហិរញ្ញវត្ថុ និងពាណិជ្ជកម្មជាច្រើន បានព្យាយាមជួបជាមួយរដ្ឋមន្ត្រីក្រសួងរតនាគារសហរដ្ឋអាមេរិក លោក Scott Bessent និងមន្ត្រីសំខាន់ៗផ្សេងទៀតរបស់រដ្ឋបាលលោក Trump ប៉ុន្តែមិនមានលទ្ធផលអ្វីទាំងអស់។ ការព្រមាន ដែលថា ពន្ធ ២៥ភាគរយលើការនាំចូលទាំងអស់របស់សហរដ្ឋអាមេរិក ដែលដាក់លើរថយន្ត ដែក និងអាលុយមីញ៉ូម ហើយបច្ចុប្បន្ន ១០ភាគរយ សម្រាប់ទំនិញផ្សេងៗទៀត ភាគច្រើននឹងបង្កឲ្យមានការខូចខាតយ៉ាងធ្ងន់ធ្ងរដល់សហរដ្ឋអាមេរិក និងបណ្ដាប្រទេសសេដ្ឋកិច្ចធំៗផ្សេងទៀត។

IMF បានបង្ហាញទស្សនៈសុទិដ្ឋិនិយបន្ថែមតិចតួច អំពីការធ្លាក់ចុះសេដ្ឋកិច្ច ដោយសារការដាក់ពន្ធខ្ពស់បំផុតជាលើកដំពូងរបស់សហរដ្ឋអាមេរិក ក្នុងរយៈពេលជាងមួយសតវត្សរ៍ ដោយកាត់បន្ថយការព្យាករកំណើនសម្រាប់ប្រទេសភាគច្រើននៅក្នុងទស្សនវិស័យសេដ្ឋកិច្ចពិភពលោករបស់ខ្លួន ប៉ុន្តែបានបញ្ឈប់ការព្យាករពីការធ្លាក់ចុះសេដ្ឋកិច្ច សូម្បីតែសម្រាប់សហរដ្ឋអាមេរិក និងប្រទេសដែលពឹងផ្អែកលើការនាំចេញ គឺចិនដែលឥឡូវនេះប្រឈមនឹងអត្រាពន្ធរបស់សហរដ្ឋអាមេរិក ១៤៥ភាគរយលើទំនិញជាច្រើន។ 

នាយកគ្រប់គ្រង IMF លោកស្រី Kristalina Georgieva បានទទួលស្គាល់ថា ប្រទេសសមាជិកមានក្ដីបារម្ភ អំពីភាពមិនប្រាកដប្រជា ចំពោះសេដ្ឋកិច្ចសកល ដែលរងផលប៉ះពាល់ដោយសារជំងឺរាតត្បាត អតិផរណា និងសង្គ្រាម ប៉ុន្តែបានសង្ឃឹមយ៉ាងមុតមាំថា ការចរចាពាណិជ្ជកម្មនឹងបន្ធូរបន្ថយភាពតានតឹងពន្ធគយ។ យ៉ាងណាក្ដី មន្ត្រីហិរញ្ញវត្ថុជាច្រើន បានប្រាប់សារព័ត៌មាន Reuters ថា ហានិភ័យនៃការមានឱនភាពសេដ្ឋកិច្ច គឺខ្ពស់ជាង ៣៧ភាគរយនៃការព្យាកររបស់ IMF ដោយលើកឡើងពីការព្យាកររបស់វិស័យឯកជន៕