រដ្ឋមន្ត្រីការបរទេសស៊ីរី លោក Asaad Al-Shaibani បានជួយលើកទង់ជាតិថ្មីរបស់ប្រទេសលោក នៅទី  ស្នាក់ការអង្គការសហប្រជាជាតិ ក្នុងទីក្រុងញូវយ៉ក កាលពីថ្ងៃសុក្រ មុននឹងអង្វរសុំសហគមន៍អន្តរជាតិឲ្យដកទណ្ឌកម្មទណ្ឌកម្មដែលបានដាក់លើប្រទេសរបស់លោក។

ការធ្វើដំណើររបស់លោក Al-Shaibani ទៅកាន់សហរដ្ឋអាមេរិក គឺជាដំណើរទស្សនកិច្ចផ្លូវការលើកដំបូងរបស់លោក ចាប់តាំងពីកងកម្លាំងប្រឆាំង បានដណ្តើមកាន់កាប់ក្រុងដាម៉ាសពីលោកប្រធានាធិបតី បាសា អាល់អាសាដ (Bashar al-Assad ) នៅក្នុងខែធ្នូ បន្ទាប់ពីសង្រ្គាមស៊ីវិលជិត ១៤ឆ្នាំ។

ថ្លែងទៅកាន់កិច្ចប្រជុំក្រុមប្រឹក្សាសន្តិសុខអង្គការសហប្រជាជាតិ លោកបាននិយាយថា ទណ្ឌកម្មដែលដាក់ដោយសហរដ្ឋអាមេរិក និងសហភាពអឺរ៉ុប ក្នុងចំណោមនោះ ត្រូវបានណែនាំ ដើម្បីកំណត់គោលដៅលើរបបរបស់លោកអាសាដ ប៉ុន្តែឥឡូវនេះអាចបង្អាក់ដំណើរផ្លាស់ប្តូរនយោបាយរបស់ប្រទេសស៊ីរី។

លោក Al-Shaibani បាននិយាយថា៖«បន្ទុកនៃទណ្ឌកម្មនៅតែបន្តគំរាមកំហែងដល់ស្ថិរភាពរបស់យើង» ។ «ការដកទណ្ឌកម្ម អាចជាជំហានដ៏សំខាន់មួយក្នុងការប្រែក្លាយប្រទេសស៊ីរីពីប្រទេសដែលល្បីល្បាញដោយសារអតីតកាលដ៏ខ្មៅងងឹតរបស់ខ្លួន ទៅជាដៃគូដ៏សកម្ម និងដ៏មានឥទ្ធិពល ក្នុងសន្តិភាព វិបុលភាព និងសេដ្ឋកិច្ចអន្តរជាតិ»។

ទណ្ឌកម្មអន្តរជាតិជាច្រើន ត្រូវបានដាក់ជាការឆ្លើយតបទៅនឹងការបង្រ្កាបយ៉ាងឃោរឃៅរបស់របបលោកអាសាដ ទៅលើក្រុមបាតុករ ក្នុងឆ្នាំ ២០១១ ដែលបានបង្កឲ្យមានសង្រ្គាមដ៏យូរ។