រដ្ឋមន្ត្រីការពារជាតិអាល្លឺម៉ង់ កាលពីថ្ងៃអាទិត្យ (ទី២៧ ខែមេសា) បាននិយាយថា អ៊ុយក្រែនមិនគួរព្រមប្រគល់ដែនដីទាំងអស់ដែលកាន់កាប់ដោយរុស្ស៊ី ក្នុងកិច្ចព្រមព្រៀងសន្តិភាពដែលស្នើឡើងដោយលោក Donald Trump ខណៈដែលប្រធានាធិបតីអាមេរិកដាក់សម្ពាធលើទីក្រុងមូស្គូ និងទីក្រុងគីវ ឲ្យបញ្ចប់ការប្រយុទ្ធគ្នា។

នៅក្នុងបទសម្ភាសជាមួយទូរទស្សន៍ ARD លោក Boris Pistorius បាននិយាយថា៖ «ជាការពិតណាស់ ប្រទេសអ៊ុយក្រែនបានទទួលស្គាល់មួយរយៈមកហើយថា បទឈប់បាញ់ ឬកិច្ចព្រមព្រៀងសន្តិភាពប្រកបដោយនិរន្តរភាព និងគួរឲ្យទុកចិត្តបាន អាចពាក់ព័ន្ធនឹងសម្បទានដែនដី»។

លោក Pistorius បានបន្ថែមថា៖ «ប៉ុន្តែទាំងនេះពិតជានឹងមិនកើតឡើងឡើយ ដូចដែលអ្វីមិនអាចទៅរួចនៅក្នុងសំណើចុងក្រោយបំផុតពីប្រធានាធិបតីអាមេរិក»។

គួរបញ្ជាក់ថា សហរដ្ឋអាមេរិកមិនបានបង្ហាញព័ត៌មានលម្អិត អំពីផែនការសន្តិភាពរបស់ខ្លួនទេ ប៉ុន្តែបានស្នើឲ្យបញ្ឈប់ការប្រយុទ្ធ នៅសមរភូមិជួរមុខ និងទទួលយកការគ្រប់គ្រងរបស់រុស្ស៊ីលើតំបន់គ្រីម៉េ ជាថ្នូរនឹងសន្តិភាព។

តែយ៉ាងណាក្ដី ក្រោយរយៈពេលប៉ុន្មានសប្តាហ៍នៃការបង្ហាញការគាំទ្រ ចំពោះលោក Vladimir Putin ក្នុងដំណើការចរចានេះ លោក Trump កាលពីថ្ងៃទី២៦ ខែមេសា ហាក់បានបង្ហាញពីឥរិយាបថថ្មី ចំពោះប្រធានាធិបតីរុស្ស៊ី។

តាមរយៈការបង្ហោះនៅលើបណ្ដាញសង្គម Truth Social របស់លោក លោក Trump បានលើកឡើងថា៖ «មិនមានហេតុផល ដើម្បីឲ្យលោក Putin បាញ់មីស៊ីលចូលទៅក្នុងតំបន់ស៊ីវិល ក៏ដូចជាទីក្រុងតូច-ធំរបស់អ៊ុយក្រែន ក្នុងរយៈពេលប៉ុន្មានថ្ងៃចុងក្រោយនេះទេ»៕