មេដឹកនាំឥស្លាមនិយមរបស់ប្រទេសស៊ីរី កាលពីថ្ងៃអាទិត្យ (ទី២៧ ខែមេសា) បានបញ្ជាក់ថា ការទាមទាររបស់ក្រុមឃឺដដែលចង់ឲ្យប្រទេសអនុម័តប្រព័ន្ធវិមជ្ឈការ នៅក្នុងរដ្ឋាភិបាល ជាសណ្ដាប់ធ្នាប់នយោបាយក្រោយរបបរបស់លោក Bashar al-Assad នោះ បង្កជាការគំរាមកំហែងដល់ការបង្រួបបង្រួមជាតិ។

ការិយាល័យរបស់មេដឹកនាំស៊ីរី លោក Ahmed al-Sharaa បានឲ្យដឹងនៅក្នុងសេចក្តីថ្លែងការណ៍ថា៖ «យើងបដិសេធយ៉ាងច្បាស់លាស់មិនទទួលយកនូវរាល់ការប៉ុនប៉ងដាក់ចេញការបែងចែក ឬបង្កើតតំបន់បំបែកខ្លួន នៅក្រោមលក្ខខណ្ឌនៃសហព័ន្ធនិយម ឬស្វ័យភាពខ្លួនឯង ដោយគ្មានឯកភាពជាតិ»។ សេចក្តីថ្លែងការណ៍បានបន្ថែមថា៖ «ការបង្រួបបង្រួមដែនដី និងប្រជាជនរបស់ស៊ីរី គឺជាបន្ទាត់ក្រហម»។

គួរបញ្ជាក់ថា ភាគីគូប្រជែងនានានៃក្រុមឃឺដ នៅស៊ីរី ដោយរួមទាំងក្រុមមានឥទ្ធិពលនៅតំបន់ភាគឦសានដែលត្រូវបានគ្រប់គ្រងដោយក្រុមឃឺដផងដែរនោះ បានព្រមព្រៀងគ្នា អំឡុងពេលមានកិច្ចប្រជុំមួយ កាលពីថ្ងៃសៅរ៍ចុងសប្ដាហ៍កន្លងមក នៅទីក្រុង Qamishli ដែលគ្រប់គ្រងដោយក្រុមឃឺដរបស់ប្រទេសស៊ីរី ពាក់ព័ន្ធនឹងចក្ខុវិស័យនយោបាយរួម សម្រាប់ជនជាតិភាគតិចឃឺដរបស់ប្រទេសស៊ីរី។

សេចក្តីថ្លែងការណ៍មួយ នៅចុងបញ្ចប់នៃសន្និសីទ ដែលមានការចូលរួមដោយមន្ត្រីអាមេរិក បានទាមទារថា រដ្ឋធម្មនុញ្ញស៊ីរី នាពេលអនាគត គួរតែកំណត់ការគោរពសិទ្ធិជនជាតិឃឺដ នៅក្នុងប្រទេសស៊ីរី បន្ទាប់ពីលោក al-Assad ត្រូវបានទម្លាក់ចេញពីអំណាច។

សេចក្តីថ្លែងការណ៍រួមតំណាងឲ្យសហគមន៍ឃឺដ បានលើកឡើងថា៖ «ចក្ខុវិស័យនយោបាយរួមឃឺដ ត្រូវបានបង្កើតឡើងដែលបង្ហាញពីឆន្ទៈរួម និងគម្រោងរបស់ខ្លួន ដើម្បីឲ្យមានដំណោះស្រាយដ៏ត្រឹមត្រូវ ចំពោះបញ្ហាឃឺដនៅក្នុងប្រទេសស៊ីរី ដែលជារដ្ឋប្រជាធិបតេយ្យវិមជ្ឈការ»៕