ប្រជាជនកាណាដា នាំគ្នាទៅបោះឆ្នោតនៅថ្ងៃចន្ទ (ទី២៨ ខែមេសា) បន្ទាប់ពីបានបញ្ចប់យុទ្ធនាការបោះឆ្នោតមួយដែលបញ្ហាពន្ធគយ និងការគិតរបស់ប្រធានាធិបតីអាមេរិក លោក Donald Trump ដែលចង់បញ្ចូលប្រទេសកាណាដាជាដែនដីឧបសម្ព័ន្ធ បានក្លាយជាបញ្ហាដ៏សំខាន់។

ការគំរាមរបស់លោក Trump បានបញ្ឆេះឲ្យមានរលកស្នេហាជាតិដែលជួយបង្កើនការគាំទ្រដល់នាយករដ្ឋមន្ត្រីរបស់គណបក្ស Liberal (សេរីនិយម) គឺលោក Mark Carney ជាអ្នកនយោបាយថ្មីដែលពីមុនបានគ្រប់គ្រងធនាគារកណ្តាលរបស់ប្រទេសចំនួន ២ ក្នុងក្រុម G7 (ប្រទេសមានឧស្សាហកម្មលូតលាស់ទាំង៧)។

យុទ្ធនាការនេះ បានបញ្ចប់ទៅដោយបរិយាកាសស្រងូតស្រងាត់ កាលពីថ្ងៃអាទិត្យ (ទី២៧ ខែមេសា) បន្ទាប់ពីបុរសម្នាក់ បានបើករថយន្ត SUV បុកចូលហ្វូងមនុស្ស នៅឯពិធីបុណ្យសហគមន៍ហ្វីលីពីន ក្នុងទីក្រុង Vancouver ដោយបានបណ្ដាលឲ្យមនុស្សយ៉ាងហោចណាស់ ១១នាក់បាត់បង់ជីវិត និងរាប់សិបនាក់ផ្សេងទៀតរងរបួស។

លោក Carney បានផ្អាកយុទ្ធនាការរបស់លោកភ្លាមៗមួយរំពេច ហើយទាំងរូបលោក និងមេដឹកនាំរបស់គណបក្ស Conservative (អភិរក្សនិយម) គឺលោក Pierre Poilievre បានលើកឡើងពីសោកនាដកម្មនេះ នៅក្នុងព្រឹត្តិការណ៍យុទ្ធនាការចុងក្រោយរបស់ពួកលោក។ គេមិនច្បាស់នោះទេថា តើព្រឹត្តិការណ៍មានមនុស្សស្លាប់ច្រើននេះ នឹងជះឥទ្ធិពលអ្វីដល់ការបោះឆ្នោតនោះទេ។ លោក Duane Bratt សាស្ត្រាចារ្យវិទ្យាសាស្ត្រនយោបាយ នៅសាកលវិទ្យាល័យ Mount Royal នៃ Calgary បាននិយាយថា លោកមិនរំពឹងថា ហេតុការណ៍នេះនឹងរារាំងអ្នកបោះឆ្នោតនោះឡើយ។

ក្រុមសេរីនិយមរបស់លោក Carney បាននាំមុខ ៤ភាគរយលើក្រុមអភិរក្សរបស់លោក Poilievre នៅក្នុងការស្ទង់មតិដាច់ដោយឡែកពីគ្នាពីស្ថាប័ន Ipsos និង Angus Reid ដែលបង្ហាញពីការប្រែប្រួលតិចតួច នៅថ្ងៃចុងក្រោយ។ ស្ថាប័ន Ipsos កាលពីថ្ងៃអាទិត្យ បានបង្ហាញថា ក្រុមសេរីនិយម មានសំឡេងគាំទ្រ ៤២ភាគរយ ហើយក្រុមអភិរក្សនិយម ៣៨ភាគរយ។ ការស្ទង់មតិកាលពីថ្ងៃសៅរ៍របស់ស្ថាប័ន Angus Reid បានដាក់សំឡេងគាំទ្រលើក្រុមសេរីនិយម ៤៤ភាគរយ ខណៈក្រុមអភិរក្សនិយម ៤០ភាគរយ។

លទ្ធផលទាំងនោះ ទំនងជាក្រុមសេរីនិយមនឹងឈ្នះ ៤អាណត្តិជាប់ៗគ្នា ប៉ុន្តែលោក Carney អាចនឹងទទួលបានសំឡេងភាគតិច នៅក្នុងសភាដែលមាន ៣៤៣អាសនៈ ដោយធ្វើឲ្យរូបលោកត្រូវពឹងផ្អែកលើគណបក្សតូចៗ ដើម្បីដឹកនាំប្រទេស៕