វិមានក្រឹមឡាំង នៅថ្ងៃចន្ទ (ទី២៨ ខែមេសា) នេះ បានឲ្យដឹងថា ប្រធានាធិបតីរុស្ស៊ីលោក Vladimir Putin បានប្រកាសជាឯកតោភាគីនូវបទឈប់បាញ់រយៈពេល ៣ថ្ងៃ នៅក្នុងប្រទេសអ៊ុយក្រែន ចាប់ពីថ្ងៃទី៨ ដល់ថ្ងៃទី១១ ខែឧសភា ដែលវានឹងកើតឡើងស្របពេលជាមួយនឹងព្រឹត្តិការណ៍រំលឹកដល់សង្រ្គាមលោកលើកទី២ ហើយបានអំពាវនាវឲ្យទីក្រុងគីវ ធ្វើដូចគ្នាដែរ។

វិមានក្រឹមឡាំង បានប្រកាសថា ការសម្រេចនេះ គឺផ្អែកលើ «ការពិចារណាមនុស្សធម៌"» ហើយបទឈប់បាញ់មួយ នឹងត្រូវធ្វើឡើងចាប់ពីពាក់កណ្ដាលអាធ្រាត្រថ្ងៃទី៨ ខែឧសភា ដល់ពាក់កណ្ដាលអាធ្រាត្រថ្ងៃទី ១១ ខែឧសភា ដើម្បីប្រារព្ធខួបលើកទី៨០ នៃទិវាជ័យជម្នះលើពួកណាស៊ីអាល្លឺម៉ង់។

ពាក់ព័ន្ធនឹងការប្រកាសនេះ អ៊ុយក្រែនមិនទាន់ឆ្លើយតបនៅឡើយទេ។ សេចក្តីថ្លែងការណ៍របស់វិមានក្រឹមឡាំង បានបន្ថែមថា៖ «រុស្ស៊ីជឿថា ភាគីអ៊ុយក្រែនគួរតែធ្វើតាមគំរូនេះ»។

សេចក្ដីថ្លែងការណ៍ បានសង្កត់ធ្ងន់ថា៖ «ក្នុងករណីមានការរំលោភលើបទឈប់បាញ់ដោយភាគីអ៊ុយក្រែន កងកម្លាំងប្រដាប់អាវុធនៃសហព័ន្ធរុស្ស៊ី នឹងផ្តល់ការឆ្លើយតបយ៉ាងសមរម្យ និងមានប្រសិទ្ធភាព។ ភាគីរុស្ស៊ីជាថ្មីម្តងទៀត បានប្រកាសពីការត្រៀមខ្លួន ដើម្បីមានកិច្ចចរចាសន្តិភាពដោយគ្មានលក្ខខណ្ឌជាមុន ពោលគឺសំដៅដល់ការលុបបំបាត់ឫសគល់នៃវិបត្តិអ៊ុយក្រែន និងអន្តរកម្មប្រកបដោយការស្ថាបនាជាមួយដៃគូអន្តរជាតិ»។

គួររំលឹកថា វិមានក្រឹមឡាំង បានប្រកាសបទឈប់បាញ់ស្រដៀងគ្នានេះរយៈពេល ៣០ម៉ោង នៅថ្ងៃបុណ្យ Easter ប៉ុន្តែខណៈពេលដែលភាគីទាំង ២ បានរាយការណ៍ពីការប្រយុទ្ធគ្នា ពួកគេបានចោទប្រកាន់គ្នាទៅវិញទៅមកអំពីការរំលោភបំពានរាប់រយដង។

សេចក្តីប្រកាសចុងក្រោយបង្អស់នេះកើតឡើងក្នុងអំឡុងពេលដែលសហរដ្ឋអាមេរិក បានពណ៌នាថា នេះជាសប្តាហ៍ «ដ៏សំខាន់» សម្រាប់កិច្ចចរចាសន្តិភាពរុស្ស៊ី-អ៊ុយក្រែន៕