ឆ្មាំល្បាតឆ្នេរទុយនេស៊ី នៅថ្ងៃចន្ទ (ទី២៨ ខែមេសា) នេះ បានស្រង់សពជនអន្តោប្រវេសន៍អាហ្វ្រិកចំនួន ៨នាក់ បន្ទាប់ពីទូកដឹកពួកគេ បានលិចនៅម្ដុំឆ្នេររបស់ប្រទេសនេះ ខណៈដែលកំពុងធ្វើដំណើរឆ្ពោះទៅអឺរ៉ុប។ នេះបើតាមមន្ត្រីសន្តិសុខម្នាក់ ដែលបានប្រាប់សារព័ត៌មាន Reuters ដោយបានបន្ថែមថា មនុស្ស ២៩នាក់ផ្សេងទៀត ត្រូវបានជួយសង្គ្រោះ។

ទូកនោះបានលិចនៅម្ដុំដែនទឹកនៃទីក្រុង Abwabed ក្បែរទីក្រុងកំពង់ផែ Sfax ជាកន្លែងចេញដំណើរ ដែលជារឿយៗត្រូវបានប្រើប្រាស់ដោយជនអន្តោប្រវេសន៍អាហ្វ្រិក។

មន្ត្រីក្នុងអង្គភាពល្បាតជាតិ លោក Houssem Eddine Jebabli បាននិយាយថា ប្រតិបត្តិការស្វែងរកកំពុងដំណើរការ ដើម្បីស្វែងរកអ្នកបាត់ខ្លួនផ្សេងទៀត។

គួរបញ្ជាក់ថា ទុយនីស៊ីកំពុងប្រឈមមុខនឹងវិបត្តិអន្តោប្រវេសន៍ដែលមិនធ្លាប់មានពីមុនមក ហើយបានជំនួសប្រទេសលីប៊ី ក្នុងនាមជាកន្លែងចេញដំណើរដ៏សំខាន់ ទាំងសម្រាប់ទុយនីស៊ី និងប្រទេសដទៃទៀត ក្នុងទ្វីបអាហ្រ្វិកដែលព្យាយាមស្វែងរកជីវិតល្អប្រសើរជាងមុន នៅអឺរ៉ុប៕