កំពង់ឆ្នាំង៖ យោងតាមផេកផ្លូវការរបស់មន្ទីរធនធានទឹក និងឧតុនិយម ដែលបានចុះផ្សាយនៅរសៀលថ្ងៃទី២៨ ខែមេសា ឆ្នាំ២០២៥នេះ បានអោយដឹងថា ក្រុមការងារក្រសួងធនធានទឹក និងអាជ្ញាធរទន្លេសាប នឹងទុករយៈពេល១ថ្ងៃទៀតអោយក្រុមហ៊ុនទឹកស្អាតអានកូក្រុងកំពង់ឆ្នាំង ក្នុងការកាយដីដែលក្រុមហ៊ុននេះ បានចាក់ចូលទន្លេសាបខុសមាត្រា១២ និងមាត្រា៣៦នៃច្បាប់ស្តីពីធនធានទឹកនៅព្រះរាជាណាចក្រកម្ពុជា។ ប្រសិនបើមិនកាយដីចេញនោះទេ ក្រសួងធនធានទឹក និងអាជ្ញាធរទន្លេសាប នឹងចាត់វិធានការកាយដីនោះចេញភ្លាម។

 តាមការបញ្ជាក់បន្ថែមរបស់មន្ទីរធនធានទឹក និងឧតុនិយមខេត្តកំពង់ឆ្នាំងបានបន្តថា៖ នៅរសៀលថ្ងៃដដែលនេះ ឯកឧត្តម អ៊ុក វុទ្ធី អនុរដ្ឋលេខាធិការ តំណាងឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម និងជាប្រធានអាជ្ញាធរទន្លេសាប, ឯកឧត្តម យិន ងួនកូលេនីន អនុរដ្ឋលេខាធិការក្រសួងធនធានទឹក, និងឯកឧត្តម ហែល តូនី អនុប្រធានក្តាប់រួមអាជ្ញាធរទន្លេសាប និងលោក អឿ សារឿន ប្រធានមន្ទីរធនធានទឹកខេត្តកំពង់ឆ្នាំងស្តីទី បានចុះពិនិត្យទីតាំងចាក់ដីចូលទន្លេសាបជាលើកទី៣ និងបានដាក់ឱសានវាទដល់ក្រុមហ៊ុនទឹកស្អាតអានកូ «ប្រសិនបើនៅថ្ងៃទី២៩ ខែមេសា ឆ្នាំ២០២៥ មិនឃើញខាងក្រុមហ៊ុនយកគ្រឿងចក្រ និងឡានមកកាយដីចូកចេញពីទន្លេនោះទេ នោះក្រសួងធនធានទឹក និងអាជ្ញាធរទន្លេសាបនឹងចាត់វិធានការផ្លូវច្បាប់ភ្លាម។

 សូមរំលឹកថា៖ ក្រុមហ៊ុនទឹកស្អាតអានកូក្រុងកំពង់ឆ្នាំង បានចាក់ដីចូលទន្លេសាបនៅចំណុចភូមិទី១ សង្កាត់ខ្សាម និងភូមិចុងកោះ សង្កាត់ផ្សារឆ្នាំង ក្រុងកំពង់ឆ្នាំង ខេត្តកំពង់ឆ្នាំង តាំងេពីថ្ងៃទី១៩ ខែមីនា ឆ្នាំ២០២៥ រហូតមកដល់ថ្ងៃទី១៩ ខែមេសា ឆ្នាំ២០២៥ ទើបខាងក្រសួងធនធានទឹក និងអាជ្ញាធរទន្លេសាបបានបញ្ជាអោយកាយចេញលើកទី១, លើកទី២ បានបើកកិច្ចប្រជុំនៅសាលាខេត្តកំពង់ឆ្នាំងដោយទុកពេល៧ថ្ងៃអោយកាយចេញគិតចាប់ពីថ្ងៃទី២២ ខែមេសា ឆ្នាំ២០២៥ និងនៅលើកទី៣នេះ គឺទុករយៈពេល១ថ្ងៃនៅថ្ងៃទី២៩ ខែមេសា ឆ្នាំ២០២៥។ ប្រជាពលរដ្ឋក្នុងខេត្តកំពង់ឆ្នាំង បានឆ្ល់ថា ហេតុអីបានក្រុមហ៊ុនទឹកស្អាតអានកូក្រុងកំពង់ឆ្នាំងចាក់ដី មិនមានអ្នកណាដឹង? ហេតុអីបានក្រុមហ៊ុនទឹកស្អាតអានកូក្រុងកំពង់ឆ្នាំង មិនអនុវត្តតាមការសន្យារបស់ខ្លួន?៕ កាំង ហុងវាស្នា