ថាមពលអគ្គិសនីបានចាប់ផ្តើមវិលត្រឡប់ទៅផ្នែកខ្លះនៃឧបទ្វីបអ៊ីបេរី កាលពីល្ងាចថ្ងៃចន្ទ (២៨ មេសា) បន្ទាប់ពីការដាច់ចរន្តទ្រង់ទ្រាយធំបាននាំឱ្យផ្នែកភាគច្រើននៃប្រទេសអេស្ប៉ាញ និងព័រទុយហ្គាល់ ត្រូវជាប់គាំង យន្តហោះមិនអាចហោះហើរបាន ការដឹកជញ្ជូនសាធារណៈត្រូវបញ្ឈប់ និងបង្ខំឱ្យមន្ទីរពេទ្យផ្អាកប្រតិបត្តិការធម្មតារបស់ខ្លួន។

ក្រសួងមហាផ្ទៃអេស្ប៉ាញ បានប្រកាសអាសន្នជាតិ ដោយដាក់ពង្រាយនគរបាល ៣០.០០០នាក់ នៅទូទាំងប្រទេស ដើម្បីរក្សាសណ្តាប់ធ្នាប់ ខណៈរដ្ឋាភិបាលនៃប្រទេសទាំងពីរបានកោះប្រជុំគណៈរដ្ឋមន្ត្រីជាបន្ទាន់។ ការដាច់ចរន្តក្នុងកម្រិតបែបនេះគឺកម្រមានណាស់នៅអឺរ៉ុប។ មូលហេតុគឺមិនច្បាស់លាស់ទេ ដោយព័រទុយហ្គាល់ បានលើកឡើងថា បញ្ហាមានប្រភពមកពីអេស្ប៉ាញ ហើយអេស្ប៉ាញ បានចង្អុលបញ្ហាដាក់ទៅបារាំង។

នាយករដ្ឋមន្ត្រីព័រទុយហ្គាល់ លោក Luis Montenegro និយាយថា ពុំមាន "ការចង្អុលបង្ហាញ" ពីការវាយប្រហារតាមអ៊ីនធឺណិតលើករណីនេះឡើយ។

នៅអេស្ប៉ាញ ថាមពលបានចាប់ផ្តើមត្រឡប់ទៅផ្នែកមួយចំនួនវិញរួមទាំងតំបន់ Barcelona នៅពេលរសៀល និងទៅកាន់ផ្នែកខ្លះនៃរដ្ឋធានី Madrid នៅយប់ថ្ងៃចន្ទ ដោយប្រហែល ៦១% នៃអគ្គីសនី ត្រូវបានស្តារឡើងវិញនៅល្ងាចថ្ងៃចន្ទ នេះបើយោងតាមប្រតិបត្តិករបណ្តាញជាតិ។

ថាមពលក៏បានត្រលប់ទៅវិញជាបណ្តើរៗទៅកាន់ក្រុងនានាក្នុងព័រទុយហ្គាល់ កាលពីល្ងាចថ្ងៃចន្ទ រួមទាំងកណ្តាលទីក្រុង Lisbon ផងដែរ ខណៈប្រតិបត្តិករបណ្តាញអគ្គិសនី REN បាននិយាយថា ស្ថានីយអគ្គិសនី ៨៥ទីតាំង ក្នុងចំណោម ៨៩ បានដំណើរការឡើងវិញ៕