សេតវិមានបានប្រកាសកាលពីថ្ងៃចន្ទ ២៨ មេសាដើមសប្ដាហ៍នេះ ពីការបង្ក្រាបលើទីជម្រកក្រុមជនអន្តោប្រវេសន៍ត្រូវបានការពារដោយច្បាប់ ដែលប្រឆាំងនឹងគោលនយោបាយអន្តោប្រវេសន៍ដ៏រឹងរូសរបស់លោក Donald Trump ខណៈការកាន់តំណែងជាប្រធានាធិបតីរបស់លោកជិតឈានដល់១០០ថ្ងៃដំបូងសម្រាប់អាណត្តិទីពីរ។

អ្នកនាំពាក្យរបស់លោក Trump លោកស្រី Karoline Leavitt បាននិយាយថា រដ្ឋបាលនឹងកំណត់ឈ្មោះទីក្រុងនានា ដែលត្រូវបានចោទប្រកាន់ពីបទរារាំងកិច្ចខិតខំប្រឹងប្រែង ដើម្បីការពារសហគមន៍អាមេរិកពីឧក្រិដ្ឋជនបរទេស។

លោកស្រីបានប្រាប់អ្នកយកព័ត៌មានថា មេដឹកនាំគណបក្សសាធារណរដ្ឋរូបនេះ នឹងចុះហត្ថលេខាលើក្រឹត្យមួយនៅពេលដ៏ខ្លី ដោយណែនាំដល់ក្រុមមន្ត្រីឱ្យចេញផ្សាយតារាងនៃយុត្តាធិការដែលរារាំងការអនុវត្តច្បាប់អន្តោប្រវេសន៍សហព័ន្ធ។

ការប្រកាសនេះបានកើតឡើងស្របពេលលោក Trump អបអរការរីកចំរើនដ៏ធំតាមការសន្យាក្នុងយុទ្ធនាការបោះឆ្នោតរបស់លោក ដែលប្ដេជ្ញាបញ្ឈប់ការឆ្លងព្រំដែនខុសច្បាប់ពីម៉ិកស៊ិក។

តួលេខជនអន្តោប្រវេសន៍បានឡើងដល់កម្រិតខ្ពស់គ្រប់ពេល ក្រោមការដឹកនាំរបស់អតីតប្រធានាធិបតី លោក Joe Biden អ្នកកាន់តំណែងមុនរបស់លោក Trump និងគណបក្សសាធារណរដ្ឋបានឈ្នះកៅអីសេតវិមានមួយផ្នែកលើការសន្យាដើម្បីប្រយុទ្ធប្រឆាំងនឹងអ្វីដែលលោកបានអះអាងម្តងហើយម្តងទៀតថា ជាការឈ្លានពាននៃឧក្រិដ្ឋជនអន្តោប្រវេសន៍។

យ៉ាងណាក៏ដោយ ប្រជាប្រិយភាពរបស់លោកបានធ្លាក់ចុះចាប់តាំងពីពេលនោះមក ដោយមានពលរដ្ឋអាមេរិកជាង៤០ ភាគរយនិយាយថាពួកគេ មិនពេញចិត្តយ៉ាងខ្លាំង ចំពោះលោកTrump នេះបើយោងតាមការស្ទង់មតិមតិរបស់សារព័ត៌មាន Washington Post និងABC៕