សេដ្ឋវិទូភាគច្រើននៅក្នុងការស្ទង់មតិរបស់សារព័ត៌មានរ៉យទ័របានព្រមានថា ហានិភ័យគឺខ្ពស់ខ្លាំងណាស់ដែលថាសេដ្ឋកិច្ចពិភពលោកនឹងធ្លាក់ចូលទៅក្នុងវិបត្តិ ឬឱនភាព នៅឆ្នាំ២០២៥នេះ ដែលក្នុងនោះអ្នកជំនាញសេដ្ឋកិច្ចជាច្រើនបាននិយាយថា ពន្ធរបស់លោកប្រធានាធិបតីអាមេរិក Donald Trump បានធ្វើឱ្យខូចដល់ទំនុកចិត្តអាជីវកម្ម។

ទើបតែបីខែកន្លងទៅ ក្រុមសេដ្ឋវិទូដូចគ្នានេះដែលគ្របដណ្តប់សេដ្ឋកិច្ចជិត៥០ បានរំពឹងថា សេដ្ឋកិច្ចពិភពលោកនឹងកើនឡើងក្នុងកម្រិតរឹងមាំ និងស្ថិរភាព។ ប៉ុន្តែជំហានរបស់លោក Trump ក្នុងការផ្លាស់ប្តូរពាណិជ្ជកម្មពិភពលោក ដោយការដាក់ពន្ធនាំចូលទាំងអស់ទៅសហរដ្ឋអាមេរិក បានបញ្ជូនរលកភ្ញាក់ផ្អើលតាមរយៈទីផ្សារហិរញ្ញវត្ថុ បំផ្លាញតម្លៃផ្សារភាគហ៊ុនរាប់លានដុល្លា និងអង្រួនទំនុកចិត្តវិនិយោគិនលើទ្រព្យសម្បត្តិអាមេរិក រួមទាំងប្រាក់ដុល្លារផងដែរ ដែលធ្លាប់ជាជម្រកដ៏សុវត្ថិភាព។

ការស្ទង់មតិរបស់រ៉យទ័រ កាលពីថ្ងៃទី០១-២៨ ខែមេសា លើហានិភ័យនៃវិបត្តិសេដ្ឋកិច្ចពិភពលោកបានបង្ហាញថា ពុំមានសេដ្ឋវិទូណាម្នាក់ឡើយក្នុងចំណោមជាង ៣០០នាក់ ដែលគិតថា ពន្ធគយមានផលប៉ះពាល់វិជ្ជមានលើអាជីវកម្ម ផ្ទុយមកវិញ តួលេខ ៩២% លើកតែពីចំណុច 'អវិជ្ជមាន'។

មានតែសេដ្ឋវិទូ ៨% ប៉ុណ្ណោះដែលនិយាយថា "អព្យាក្រឹត" ដែលភាគច្រើនមកពីឥណ្ឌា និងប្រទេសមានសេដ្ឋកិច្ចកំពុងរីកចម្រើនផ្សេងទៀត។

សេដ្ឋវិទូបីភាគបួន បានកាត់បន្ថយការព្យាករកំណើនសកលឆ្នាំ២០២៥ របស់ពួកគេ ដោយនាំឱ្យមធ្យមភាគមកនៅត្រឹម ២,៧% ពីតួលេខ ៣,០% នៅក្នុងការស្ទង់មតិខែមករា។ ដោយប្រឈមមុខនឹងភាពមិនច្បាស់លាស់ដែលកើនឡើង និងពន្ធខ្ពស់រាប់សតវត្សរ៍លើទំនិញ អាជីវកម្មសកលជាច្រើនបានដកថយ ឬកាត់បន្ថយការព្យាករប្រាក់ចំណូលរបស់ពួកគេ៕