រដ្ឋមន្ត្រីការបរទេសនៃប្រទេសប្រេស៊ីល ចិន រុស្ស៊ី និងសមាជិកប្រទេស BRICS ផ្សេងទៀត បានចាប់ផ្តើមកិច្ចពិភាក្សារយៈពេលពីរថ្ងៃនៅទីក្រុង Rio de Janeiro ប្រទេសប្រេស៊ីល ក្នុងគោលបំណងបង្កើតរណសិរ្សរួបរួមមួយចំពោះគោលនយោបាយពាណិជ្ជកម្មជ្រុលហួសហេតុរបស់ប្រធានាធិបតីសហរដ្ឋអាមេរិក លោក Donald Trump ។

កិច្ចប្រជុំនេះ ធ្វើឡើងក្នុងពេលដ៏សំខាន់សម្រាប់សេដ្ឋកិច្ចពិភពលោក បន្ទាប់ពីមូលនិធិរូបិយវត្ថុអន្តរជាតិ(IMF)បានបន្ទាបការព្យាករកំណើន ជុំវិញផលប៉ះពាល់នៃការដំឡើងពន្ធថ្មីរបស់មេដឹកនាំសហរដ្ឋអាមេរិក។

អ្នកការទូតជាន់ខ្ពស់មកពីប្លុកដែលមានសមាជិកចំនួន១១ប្រទេស រួមមានអេហ្ស៊ីប អេត្យូពី ឥណ្ឌា ឥណ្ឌូនេស៊ី អ៊ីរ៉ង់ អារ៉ាប៊ីសាអូឌីត អាហ្រ្វិកខាងត្បូង និងអារ៉ាប់រួម បានជួបប្រជុំគ្នាដើម្បីរៀបចំរបៀបវារៈរបស់ខ្លួនមុនកិច្ចប្រជុំកំពូលមេដឹកនាំនៅខែកក្កដា។ រដ្ឋមន្ត្រីការបរទេសប្រេស៊ីល លោក Mauro Vieira បានសង្កត់ធ្ងន់លើសារៈសំខាន់នៃកិច្ចសន្ទនាក្នុងពេលមាន «វិបត្តិមនុស្សធម៌ ជម្លោះប្រដាប់អាវុធ អស្ថិរភាពនយោបាយ និងការលុបបំបាត់ពហុភាគីនិយម»។

លោក Trump ចាប់តាំងពីបានវិលត្រឡប់ទៅកាន់សេតវិមានវិញក្នុងខែមករា បានវាយប្រហារប្រទេសរាប់សិបដោយការដំឡើងពន្ធ១០ភាគរយ ប៉ុន្តែប្រទេសចិនប្រឈមនឹងការដំឡើងពន្ធរហូតដល់១៤៥ ភាគរយលើផលិតផលជាច្រើន។ ទីក្រុងប៉េកាំង ក៏បានឆ្លើយតបដោយការដំឡើងពន្ធ១២៥ភាគរយលើទំនិញរបស់សហរដ្ឋអាមេរិក។