រដ្ឋមន្ត្រីការពារជាតិរបស់ប្រទេសប៉ាគីស្ថាន បាននិយាយកាលពីថ្ងៃចន្ទថា ការលុកលុយផ្នែកយោធា ដោយប្រទេសឥណ្ឌានៅជិតខាង អាចជិតកើតមានឡើង បន្ទាប់ពីការវាយប្រហារដោយក្រុមសកម្មប្រយុទ្ធយ៉ាងបង្ហូរឈាមទៅលើភ្ញៀវទេសចរនៅតំបន់កាស្មៀរកាលពីសប្តាហ៍មុន ខណៈភាពតានតឹងកើនឡើងរវាងប្រទេសដែលមានអាវុធនុយក្លេអ៊ែរទាំងពីរ។

ការវាយប្រហារដោយក្រុមសកម្មប្រយុទ្ធ បានសម្លាប់មនុស្ស២៦នាក់ និងបានបង្កឱ្យមានកំហឹងនៅក្នុងប្រទេសឥណ្ឌា រួមជាមួយនឹងការអំពាវនាវឱ្យមានចំណាត់ការប្រឆាំងប៉ាគីស្ថាន។ ឥណ្ឌា បានចោទប្រកាន់ប្រទេសប៉ាគីស្ថាន ពីការគាំទ្រក្រុមសកម្មប្រយុទ្ធនៅតំបន់កាស្មៀរ ជាតំបន់អះអាងសិទ្ធិដោយប្រទេសទាំង២ និងបានប្រយុទ្ធគ្នាពីរលើករួចមកហើយ។

រដ្ឋមន្ត្រីការពារជាតិ លោក Khawaja Muhammad Asif បានប្រាប់សារព័ត៌មានរ៉យទ័រក្នុងបទសម្ភាសន៍មួយនៅឯការិយាល័យរបស់លោកក្នុងទីក្រុង Islamabad ថា «យើងបានពង្រឹងកងកម្លាំងរបស់យើង ព្រោះថា រឿងរ៉ាវនឹងជិតកើតមានឡើង»។

លោក Asif បាននិយាយថា វោហាសាស្ត្ររបស់ប្រទេសឥណ្ឌាកំពុងកើនឡើង ហើយយោធាប៉ាគីស្ថានបានពន្យល់ប្រាប់រដ្ឋាភិបាលអំពីលទ្ធភាពនៃការវាយប្រហារពីសំណាក់ប្រទេសឥណ្ឌា។ លោកពុំបានផ្តល់ព័ត៌មានលម្អិតបន្ថែមអំពីមូលហេតុដែលលោកគិតថាការលុកលុយ ជិតកើតមានឡើង នោះទេ។

ក្រោយការវាយប្រហារនៅតំបន់កាស្មៀរ ប្រទេសឥណ្ឌា បានកំណត់អត្តសញ្ញាណជនសកម្មប្រយុទ្ធពីររូបជាជនជាតិប៉ាគីស្ថាន។ ទីក្រុងអ៊ីស្លាម៉ាបាដ បានច្រានចោលនូវការជាប់ពាក់ព័ន្ធណាមួយ ហើយបានអំពាវនាវឲ្យមានការស៊ើបអង្កេតអព្យាក្រឹត។

លោក Asif បាននិយាយថា ប្រទេសប៉ាគីស្ថានមានការប្រុងប្រយ័ត្នខ្ពស់ ហើយខ្លួនមានតែប្រើប្រាស់ឃ្លាំងអាវុធនុយក្លេអ៊ែរប៉ុណ្ណោះ ប្រសិនបើ «មានការគំរាមកំហែងដោយផ្ទាល់ចំពោះអត្ថិភាពរបស់យើង»។