អតិផរណាតម្លៃស្បៀងអាហាររបស់ចក្រភពអង់គ្លេស បានហក់ឡើងដល់កម្រិតខ្ពស់បំផុតក្នុងរយៈពេលជិត ១ឆ្នាំនៅក្នុងខែមេសា នេះបើយោងតាមការស្ទង់មតិចេញផ្សាយនៅថ្ងៃអង្គារ (២៩ មេសា) នេះ ដែលបាននិយាយថា ការចំណាយខ្ពស់សម្រាប់អ្នកលក់រាយ អាចដាក់សម្ពាធកាន់តែខ្លាំងបន្ថែមទៀតលើតម្លៃទំនិញសម្រាប់ប្រជាជន។

សម្ព័ន្ធលក់រាយរបស់ចក្រភពអង់គ្លេស BRC បានព្រមានពីហានិភ័យនៃសម្ពាធតម្លៃកើនឡើងកាន់តែអាក្រក់ នៅក្នុងប៉ុន្មានខែបន្ទាប់ ដោយសារឧស្សាហកម្មនេះប្រឈមនឹងការចំណាយខ្ពស់ រួមទាំងពន្ធលើការវេចខ្ចប់ថ្មី ដែលនឹងចូលជាធរមាននៅក្នុងខែតុលា ខាងមុខនេះ។

BRC និយាយថា អតិផរណាតម្លៃស្បៀងអាហារបានកើនឡើងប្រចាំឆ្នាំ ២,៦% ក្នុងខែមេសា ដែលជាកំណើនខ្លាំងជាងតួលេខ ២,៤% ក្នុងខែមីនា ហើយក៏ជាការហក់ឡើងដ៏ធំបំផុតចាប់តាំងពីខែឧសភា ឆ្នាំ២០២៤ មក នៅពេលដែលតួលេខឈរនៅ ៣,២%។

ប៉ុន្តែតម្លៃទំនិញទាំងមូលក្នុងហាងលក់ដូរ បានធ្លាក់ចុះ ០,១% ក្នុងពេល ១២ខែដល់ខែមេសា បន្ទាប់ពីការធ្លាក់ចុះប្រចាំឆ្នាំ ០,៤% កាលពីខែមុន។ ធនាគារកណ្ដាលអង់គ្លេស កំពុងព្យាយាមវាស់ស្ទង់ថា តើកម្រិតណានៃបន្ទុកពន្ធខ្ពស់សម្រាប់និយោជក នឹងនាំឱ្យមានការកើនឡើងតម្លៃទំនិញនៅក្នុងហាង ព្រមទាំងបង្កើនហានិភ័យនៃសម្ពាធអតិផរណាខ្ពស់ជាប់លាប់៕