ប្រព័ន្ធផ្សព្វផ្សាយអ៊ីស្រាអែលបានរាយការណ៍ថា ប្រមុខអង្គភាពសេវាចារកម្មក្នុងស្រុករបស់អ៊ីស្រាអែល លោក Ronen Bar បានប្រកាសលាលែងពីតំណែង ហើយនឹងចុះចេញនៅថ្ងៃទី ១៥ ខែមិថុនា រយៈពេល៦សប្តាហ៍បន្ទាប់ពីនាយករដ្ឋមន្រ្តី លោក Benjamin Netanyahu បានព្យាយាមបណ្តេញប្រធានសន្តិសុខរូបនេះ។

ទីភ្នាក់ងារចារកម្ម Shin Bet ដែលគ្រប់គ្រងការស៊ើបអង្កេតប្រឆាំងអំពើភេរវកម្ម គឺជាចំណុចកណ្តាលនៃសមរភូមិនយោបាយកំពុងកើនឡើង ដែលដាក់រដ្ឋាភិបាលចម្រុះស្តាំនិយមរបស់លោក Netanyahu ប្រឆាំងក្រុមអ្នករិះគន់ផ្សេងៗ មានចាប់ពីសមាជិកនៃស្ថាប័នសន្តិសុខ រហូតដល់គ្រួសារចំណាប់ថ្នូរនៅតំបន់ហ្កាហ្សា។

លោក Netanyahu បាននិយាយកាលពីថ្ងៃទី១៦ ខែមីនា ថា លោកបានដកសេចក្តីទុកចិត្តជាយូរមកហើយលើលោក Bar ហើយការជឿទុកចិត្តនោះគឺលើប្រមុខអង្គភាពសេវាសន្តិសុខក្នុងស្រុក ដែលតួនាទីរបស់ពួកគេរួមមានការប្រយុទ្ធប្រឆាំងភេរវកម្ម និងសន្តិសុខសម្រាប់មន្ត្រីរដ្ឋាភិបាល ជាពិសេសគឺមានសារៈសំខាន់នៅពេលមានសង្រ្គាម។

តុលាការកំពូល បានផ្អាកបណ្តោះអាសន្ននូវបំណងរបស់រដ្ឋាភិបាលក្នុងការបណ្តេញលោក Bar ជាអ្នកដែលបានអះអាងថាលោក Netanyahu មានបំណងបណ្តេញលោក បន្ទាប់ពីលោកបានបដិសេធមិនបំពេញសំណើដែលរួមមានចារកម្មលើក្រុមបាតុករអ៊ីស្រាអែល និងការរំខានដល់ការជម្រះក្តីអំពើពុករលួយរបស់មេដឹកនាំ។ លោក Netanyahu ក្នុងការឆ្លើយតបទៅនឹងការចោទប្រកាន់នេះ បានចោទលោក Bar ថាបាននិយាយកុហក។