អង្គភាពសេវាព្រៃឈើក្នុងតំបន់បាននិយាយថា ក្រុមអ្នកពន្លត់អគ្គិភ័យប្រទេសកូរ៉េខាងត្បូង បានបន្តធ្វើការពេញមួយយប់ដើម្បីគ្រប់គ្រងចំហេះព្រៃនៅក្នុងទីក្រុង Daegu ភាគអាគ្នេយ៍នៅថ្ងៃអង្គារ ទី២៩ ខែ មេសា នេះ។ ចំហេះព្រៃ បានចាប់ផ្តើមនៅម៉ោងប្រហែល២រសៀល ម៉ោងក្នុងស្រុក កាលពីថ្ងៃចន្ទ ហើយបាន ប៉ះពាល់ដល់ផ្ទៃដីប្រមាណ២៦០ហិកតា។

រហូតមកដល់ពេលនេះ គ្មានអ្នកស្លាប់និងរងរបួសណាម្នាក់ត្រូវបានរាយការណ៍ទេ ដោយសារតែចំហេះព្រៃនៅជុំវិញទីក្រុង Daegu មានចម្ងាយប្រហែល២៣៣គីឡូម៉ែត្រ ភាគអាគ្នេយ៍រដ្ឋធានីសេអ៊ូល។

អង្គភាពសេវាព្រៃឈើប្រទេសកូរ៉េ បាននិយាយថា ឧទ្ធម្ភាគចក្រចំនួន៥៣គ្រឿង និងបុគ្គលិកពន្លត់អគ្គិភ័យចំនួន១.៥៥១នាក់ ត្រូវបានដាក់ពង្រាយទៅកាន់តំបន់ចំហេះព្រៃ។

អង្គភាពនេះបាននិយាយបន្ថែមថាចំហេះព្រៃប្រហែល៨២ភាគរយនៅក្នុងតំបន់នេះ ត្រូវបានពន្លត់គិតត្រឹមម៉ោង៨ព្រឹកថ្ងៃអង្គារនេះ។ អាជ្ញាធរនិយាយថា រដ្ឋមន្ត្រីសុវត្ថិភាពស្តីទីលោក Ko Ki-dong បានចុះពិនិ្យតំបន់រងការខូចខាត ហើយបានជួបជាមួយប្រជាជនជម្លៀសខ្លួន និងអ្នកស្ម័គ្រចិត្តនៅតាមទីជម្រកមួយចំនួន។

កាលពីខែមីនា ប្រទេសកូរ៉េខាងត្បូង បានទទួលរងគ្រោះមហន្តរាយចំហេះព្រៃធម្មជាតិដ៏អាក្រក់បំផុតមិនធ្លាប់មានរបស់ប្រទេសនេះ ដោយមនុស្សជិត៣០នាក់បានស្លាប់ និងប្រាសាទប្រវត្តិសាស្ត្រត្រូវបានឆេះបំផ្លាញ។