ប្រទេសជប៉ុន បានផ្តល់ឧបករណ៍វិទ្យាសាស្ត្រទំនើបដល់ប្រទេសអ៊ុយក្រែនដើម្បីជួយកំណត់អត្តសញ្ញាណសាកសពមនុស្ស និងប្រមូលភស្តុតាងសម្រាប់ឧក្រិដ្ឋកម្មសង្គ្រាម។

មន្ត្រីអ៊ុយក្រែន ចាំបាច់ត្រូវកំណត់អត្តសញ្ញាណមនុស្សជាច្រើននាក់ដែលត្រូវបានសម្លាប់ក្រោយការឈ្លានពានរបស់រុស្ស៊ី។ ពួកគេក៏ចាំបាច់ត្រូវប្រមូលភស្តុតាងក្នុងការស៊ើបអង្កេតលើឧក្រិដ្ឋកម្មសង្រ្គាមដែលសង្ស័យ ធ្វើឡើងដោយរុស្ស៊ី។

រដ្ឋាភិបាលជប៉ុន បានផ្តល់ឲ្យក្រសួងមហាផ្ទៃអ៊ុយក្រែន នូវឧបករណ៍វិទ្យាសាស្ត្រចំនួន៧ឈុត រួមទាំងឧបករណ៍មួយប្រភេទដែលមានសមត្ថភាពវិភាគសំណាក DNA មួយចំនួន។ វាក៏រួមមានទាំងឧបករណ៍ដែលត្រូវបានប្រើប្រាស់សម្រាប់ធ្វើការពិនិត្យរាវរកសារធាតុដូចជា គ្រឿងផ្ទុះ និងគ្រាប់កាំភ្លើងជាដើម។

ការផ្តល់នេះ ត្រូវបានអនុវត្តតាមរយៈកម្មវិធីអភិវឌ្ឍន៍របស់អង្គការសហប្រជាជាតិ។ នៅក្នុងពិធីមួយនៅជិតរដ្ឋធានីគីវកាលពីថ្ងៃច័ន្ទ អនុរដ្ឋមន្ត្រីក្រសួងមហាផ្ទៃ លោក Leonid Tymchenko បាននិយាយថា នៅអ៊ុយក្រែន សាកសពមនុស្សរាប់ពាន់នាក់ពុំត្រូវបានកំណត់អត្តសញ្ញាណ ហើយមនុស្សជាច្រើនកំពុងបាត់ខ្លួន។ លោកបានសង្កត់ធ្ងន់ថា ការគាំទ្ររបស់ប្រទេសជប៉ុនមានសារៈសំខាន់ និងចាំបាច់។

ក្រសួង មានផែនការបញ្ជូនឧបករណ៍ដែលត្រូវបានផ្តល់ឲ្យទៅកាន់តំបន់ក្បែរសមរភូមិដើម្បីពង្រឹងសមត្ថភាពស៊ើបអង្កេត។ ឯកអគ្គរដ្ឋទូតជប៉ុនប្រចាំនៅអ៊ុយក្រែន លោក Nakagome Masashi បាននិយាយថា លោកចង់ឱ្យមន្ត្រីអ៊ុយក្រែន ប្រើប្រាស់ជំនាញទំនើប និងជំនាញកម្រិតខ្ពស់របស់ប្រទេសជប៉ុនក្នុងវិស័យនេះ។ លោក ឯកអគ្គរដ្ឋទូតបាននិយាយថា លោកសង្ឃឹមថា ឧបករណ៍នេះនឹងជួយប្រមូលព័ត៌មានអំពីអ្នកបាត់ខ្លួន។