ក្នុងឱកាស អញ្ជើញជាអធិបតីសម្ពោធបើកឱ្យប្រើប្រាស់ជាផ្លូវការផ្លូវជាតិលេខ៣៣ ផ្លូវជាតិលេខ៣១ និងផ្លូវជាតិលេខ៤១ ប្រវែងសរុបជាង ២០០គ.ម នៅស្រុកត្រាំកក់ ខេត្តតាកែវ នាព្រឹកថ្ងៃទី២៩ ខែមេសា ឆ្នាំ២០២៥ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី មានប្រសាសន៍បញ្ជាក់ថា ក្នុងរយៈពេលជាង៤០ឆ្នាំមកនេះកម្ពុជាបានវិវត្តរីកចម្រើនលើគ្រប់វិស័យ ហើយមិនមែនរីកចម្រើនតែនៅរាជធានីភ្នំពេញប៉ុណ្ណោះទេ ប៉ុន្ដែបានរីកចម្រើននៅគ្រប់បណ្ដារាជធានី-ខេត្ត ដែលមានទាំងហេដ្ឋារចនាសម្ព័ន្ធ សាលារៀន មន្ទីរពេទ្យ និងជីវភាពរបស់ប្រជាពលរដ្ឋមានភាពធូរធារជាងមុន។

សម្ដេចធិបតី នាយករដ្ឋមន្រ្ដី មានប្រសាសន៍បញ្ជាក់ថា ការរៀបចំបណ្តាញផ្លូវនានានៅតាមបណ្ដាខេត្ត គជាការតភ្ជាប់បណ្ដាញសេដ្ឋកិច្ចកម្ពុជាទៅដល់មូលដ្ឋាន ដូចទៅនឹងសរសៃឈាមរបស់មនុស្ស គឺត្រូវតែរត់ទៅគ្រប់កោសិកា ទើបរាងកាយរឹងមាំល្អ។ ដូច្នេះការអភិវឌ្ឍសេដ្ឋកិច្ច មិនមែនអភិវឌ្ឍតែនៅភ្នំពេញនោះទេ គឺត្រូវតែអភិវឌ្ឍនៅគ្រប់ខេត្ត។ សម្ដេចថ្លែងថា កិច្ចអភិវឌ្ឍរបស់កម្ពុជាមិនមែនធ្វើតែនៅភ្នំពេញនោះទេ បច្ចុប្បន្នបានពង្រាយនៅពាសពេញផ្ទៃប្រទេស។

សូមជម្រាបថា ប្រទេសកម្ពុជា ក្រោមការដឹកនាំដោយគណបក្សប្រជាជនកម្ពុជា ក្នុងរយៈពេលជាង ៤០ ឆ្នាំមកនេះបានដាក់ចេញនូវគោលនយោបាយច្បាស់លាស់ ក្នុងការអភិវឌ្ឍសង្គម សេដ្ឋកិច្ចប្រទេសកម្ពុជាឱ្យមានការរីកចម្រើនលើគ្រប់វិស័យ។ ជាពិសេសតាមរយៈគោលនយោបាយច្បាស់លាស់របស់រាជរដ្ឋាភិបាលតាំងពីអាណត្តិមុនៗរហូតដល់អាណ្តិទី៧នេះ បានដាក់ចេញនូវយុទ្ធសាស្រ្ដបញ្ចកោណដំណាក់កាលទី១ ដោយគិតគូរសំខាន់លើការអភិវឌ្ឍរីកចម្រើនដល់ជីវភាពរបស់បងប្អូនប្រជាពលរដ្ឋនៅមូលដ្ឋាន៕

អត្ថបទ៖ វ៉ន ដារ៉ា