កណ្ដាល៖ ឯកឧត្តម គង់ សោភ័ណ្ឌ ប្រធានគណៈកម្មាធិការសាខាកាកបាទក្រហមកម្ពុជាខេត្តកណ្ដាល សហការរី មន្ត្រីរាជការ និងសប្បុរសជននានា នៅព្រឹកថ្ងៃទី០៨ ខែធ្នូនេះ បានចែកអាវរងារ ភួយ និងស្បៀងអាហារមួយចំនួនដល់ពលរដ្ឋ ចាស់ជរា និងមានជីវភាពខ្វះខាត ចំនួន៣៩៨នាក់ ក្នុងសង្កាត់៦ ក្រុងតាខ្មៅ។
ឯកឧត្ដម គង់ សោភ័ណ្ឌ បានបញ្ជាក់ថា ការចែកអំណោយនេះ ធ្វើឡើងដើម្បីឆ្លើយតបតាមការអំ ពាវនាវរបស់សម្ដេចតេជោ ហ៊ុន សែន នាយករដ្ឋមន្ត្រី ឱ្យអាជ្ញាធរ ត្រូវយកចិត្តទុកដាក់ ចំពោះជនងាយរងគ្រោះ ក្នុងពេលមានធាតុអាកាសត្រជាក់ចូលមកដល់ ដើម្បីរក្សាភាពកក់ក្តៅ និងសុវត្ថិភាព។
ឯកឧត្ដម បានបញ្ជាក់បន្ថែមថា ការចែកអំណោយជាអាវរងារ ភួយ និងស្បៀងអាហារនេះ នឹងបន្តចែកជូនពលរដ្ឋនៅក្នុងខេត្តកណ្ដាលជាបន្តបន្ទាប់ទៀត មិនទុកឱ្យពលរដ្ឋម្នាក់នាជួបការលំបាកឡើយ។
ឯកឧត្តម បានផ្ដាំផ្ញើសួរសុខទុក្ខពីសំណាក់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដោយក្តីនឹករលឹកបំផុត និងបានថ្លែងនូវការកោតសរសើរ និងថ្លែងអំណរគុណយ៉ាងជ្រាលជ្រៅចំពោះទឹកចិត្តដ៏សប្បុរសប្រកបដោយព្រហ្មវិហារធម៌ របស់សប្បុរសជនទាំងអស់ ដែលបានបរិច្ចាគធនធាន ពេលវេលា កម្លាំងកាយចិត្ត ចេញពីបេះដូងមនុស្សធម៌សុទ្ធសាធ ក្នុងការចូលរួមចំណែកជួយដល់ជនរងគ្រោះ និងជនងាយរងគ្រោះបំផុត នៅក្នុងខេត្តកណ្ដាល។
ឯកឧត្ដម គង់ សោភ័ណ្ឌ បានណែនាំឱ្យមនុស្សវ័យចំណាស់ និងប្រជាពលរដ្ឋទាំងអស់ថែរក្សាសុខភាពរបស់ខ្លួនឱ្យបានល្អ តាមការណែនាំរបស់ក្រសួងសុខាភិបាល ពិសេសក្នុងកាលៈទេសៈ ដែលកម្ពុជាមិនទាន់បានបញ្ចប់ជំងឺកូវីដ-១៩នៅឡើយនេះ។
បើយោងតាមក្រសួងធនធានទឹក និងឧតុនិយម អាកាសធាតុត្រជាក់ នឹងបន្តរហូតដល់ខែកុម្ភៈ ឆ្នាំ២០២២ ហើយអាកាសធាតុត្រជាក់នេះ នឹងធ្វើឱ្យសីតុណ្ហភាពនៅតំបន់នានាក្នុងប្រទេស ធ្លាក់ចុះមក នៅត្រឹម១៥អង្សារសេ៕ អត្ថបទ៖ សៅ យ៉ាម៉ង់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
