ក្រសួងការពារជាតិរបស់ទីក្រុងញូវដែលី បាននិយាយកាលពីថ្ងៃចន្ទថា ប្រទេសឥណ្ឌា បានចុះហត្ថលេខាលើកិច្ចសន្យាទិញយន្តហោះចម្បាំង Rafale ចំនួន ២៦គ្រឿង ពីប្រទេសបារាំង ដោយកិច្ចព្រមព្រៀងនេះ មានតម្លៃរាប់ពាន់លានដុល្លារ ដែលរួមបញ្ចូលទាំងយន្តហោះកៅអីតែមួយ និងកៅអីពីរ។

នៅពេលដឹកជញ្ជូន យន្តហោះទាំងនោះ នឹងចូលរួមជាមួយយន្តហោះចម្បាំង Rafale ដែលផលិតដោយបារាំងចំនួន ៣៦គ្រឿង ដែលញូវដែលីបានទិញរួចហើយ ជាផ្នែកមួយនៃកិច្ចខិតខំប្រឹងប្រែងរបស់ខ្លួន ដើម្បីធ្វើទំនើបកម្មគ្រឿងយុទ្ធោបករណ៍របស់ខ្លួន យ៉ាងឆាប់រហ័ស។

ក្រសួងការពារជាតិ បាននិយាយនៅក្នុងសេចក្តីថ្លែងការណ៍មួយថា៖«រដ្ឋាភិបាលនៃប្រទេសឥណ្ឌា និងបារាំង បានចុះហត្ថលេខាលើកិច្ចព្រមព្រៀងអន្តររដ្ឋាភិបាលមួយសម្រាប់ការទិញយន្តហោះចម្បាំង Rafale ចំនួន ២៦គ្រឿង។

យន្តហោះដែលផលិតដោយក្រុមហ៊ុនអាកាសចរណ៍បារាំង Dassault Aviation ត្រូវបានគេរំពឹងថា នឹងដំណើរការពីនាវាផ្ទុកយន្តហោះ ដែលផលិតនៅឥណ្ឌា ដោយជំនួសឲ្យយន្តហោះ MiG-29K របស់រុស្ស៊ី។

ក្រសួងការពារជាតិឥណ្ឌា បាននិយាយថា៖«កិច្ចព្រមព្រៀងទិញនេះ រួមបញ្ចូលទាំងការហ្វឹកហ្វឺន គ្រូបណ្តុះបណ្តាល គ្រឿងបន្លាស់ អាវុធ និងការដឹកជញ្ជូនផ្អែកលើការអនុវត្ត» ក៏ដូចជាយន្តហោះមានកៅអីតែមួយចំនួន ២២គ្រឿង និងយន្តហោះកៅអីពីរចំនួន ៤គ្រឿង។

«កិច្ចព្រមព្រៀងទិញនេះដែរ ក៏រួមបញ្ចូលនូវឧបករណ៍បន្ថែមសម្រាប់កងនាវា Rafale ដែលមានស្រាប់របស់កងកម្លាំងអាកាសឥណ្ឌា (IAF)»។

រដ្ឋាភិបាលឥណ្ឌា បានប្រកាសពីបំណងរបស់ខ្លួន ក្នុងការទិញយន្តហោះចម្បាំង Rafales ចំនួន ២៦ គ្រឿង ក្នុងឆ្នាំ ២០២៣ នៅពេលដែលលោកនាយករដ្ឋមន្រ្តី ណារិនដ្រា ម៉ូឌី (Narendra Modi) បានធ្វើទស្សនកិច្ចនៅប្រទេសបារាំងសម្រាប់ការប្រារព្ធពិធីបុណ្យជាតិ Bastille Day។