នាយករដ្ឋមន្ត្រីអង់គ្លេស លោក Keir Starmer បានជួបសមភាគីប៉ាឡេស្ទីន លោក Mohammed Mustafa នៅទីក្រុងឡុងដ៍ កាលពីថ្ងៃចន្ទ ដែលជាផ្នែកមួយនៃកិច្ចខិតខំប្រឹងប្រែងរបស់រដ្ឋាភិបាលចក្រភពអង់គ្លេស ដើម្បីជំរុញបុព្វហេតុនៃភាពជារដ្ឋប៉ាឡេស្ទីន។

ក្នុងអំឡុងពេលនៃកិច្ចប្រជុំរបស់ពួកគេ លោក Starmer បានសម្តែងនូវ «ការរំលែកទុក្ខដ៏ស្មោះស្ម័គ្រចំពោះការបាត់បង់ជីវិតដ៏គួរឲ្យសោកស្ដាយ នៅក្នុងតំបន់ហ្កាហ្សា» ដែលសកម្មភាពយោធារបស់អ៊ីស្រាអែល ចាប់តាំងពីចុងឆ្នាំ ២០២៣ បានសម្លាប់ប្រជាជនប៉ាឡេស្ទីនជាង ៥០.000នាក់។

លោកបាននិយាយថា ចក្រភពអង់គ្លេស នឹងបន្តជំរុញឲ្យមានកិច្ចព្រមព្រៀងបទឈប់បាញ់រវាងអ៊ីស្រា   អែល និងក្រុមហាម៉ាស ហើយប្រឆាំងនឹងការបន្តសង្គ្រាម នៅតំបន់ហ្កាហ្សា បន្ទាប់ពីការដួលរលំនៃបទឈប់បាញ់ កាលពីពាក់កណ្តាលខែមីនា។

លោក Mustafa ជាមេដឹកនាំអាជ្ញាធរប៉ាឡេស្ទីនដំបូងគេ ដែលបានទៅទស្សនកិច្ចសភាអង់គ្លេស ចាប់តាំងពីឆ្នាំ ២០២១ ក៏បានជួបជាមួយរដ្ឋមន្ត្រីការបរទេសលោក David Lammy ផងដែរ។ ក្រសួងការបរទេសអង់គ្លេស បាននិយាយថា ពួកគេបានចុះហត្ថលេខាលើអនុស្សរណៈនៃការយោគយល់គ្នា ដែល  «បញ្ជាក់ពីការប្តេជ្ញាចិត្តរបស់ពួកគេ ក្នុងការជំរុញភាពជារដ្ឋប៉ាឡេស្ទីន ជាផ្នែកនៃដំណោះស្រាយរដ្ឋពីរ»។ ឯកសារនេះ បានបញ្ជាក់ពីទស្សនៈដែលថា អាជ្ញាធរប៉ាឡេស្ទីន (PA) គឺជា «អង្គភាពគ្រប់គ្រងស្របច្បាប់តែមួយគត់» នៅក្នុងទឹកដីប៉ាឡេស្ទីនដែលគ្រប់គ្រងដោយអ៊ីស្រាអែល រួមមានតំបន់ហ្កាហ្សា ទីក្រុងហ្ស៊េរុយសាឡឹមខាងកើត និងតំបន់វេសបែង (West Bank)។