អ្នកជំនាញបានលើកឡើងថា ការទទួលស្គាល់ការបញ្ចូលជាដែនដីឧបសម្ព័ន្ធរបស់រុស្ស៊ី ចំពោះឧបទ្វីបសមុទ្រខ្មៅរបស់អ៊ុយក្រែន គឺតំបន់គ្រីម៉េ នឹងធ្វើឲ្យខូចដល់សណ្តាប់ធ្នាប់អន្តរជាតិ និងបង្កើនការប្រឈមផ្នែកច្បាប់ ខណៈដែលវិមានក្រឹមឡាំង កាលពីថ្ងៃចន្ទ (ទី២៨ ខែមេសា) បានហៅសម្បទាននេះថា ជា «ភាពចាំបាច់» ដើម្បីដោះស្រាយជម្លោះ។

ការអត្ថាធិប្បាយនេះបានកើតឡើងនៅពេលដែលប្រធានាធិបតីអាមេរិក លោក Donald Trump បានជំរុញឲ្យរុស្ស៊ីទទួលយកបទឈប់បាញ់មួយ ដោយប្រាប់អ្នកសារព័ត៌មានកាលពីថ្ងៃទី២៧ ខែមេសាថា លោកជឿជាក់ថា លោក Volodymyr Zelensky អាចនឹងទទួលស្គាល់តំបន់គ្រីម៉េ ជាផ្នែកនៃដំណោះស្រាយ ជាការលើកឡើងដែលមេដឹកនាំអ៊ុយក្រែនបានច្រានចោលម្តងហើយម្តងទៀត។

ប៉ុន្តែខណៈពេលដែលកិច្ចព្រមព្រៀងកាន់តែអាចលេចចេញជារូបរាងឡើង អ្នកជំនាញបានលើកឡើងពីការព្រួយបារម្ភ អំពីភាពស្របច្បាប់នៃកិច្ចព្រមព្រៀងណាមួយ ដែលនឹងជាការផ្លាស់ប្តូរដ៏ធំធេង នៅក្នុងសណ្ដាប់ធ្នាប់អន្តរជាតិក្រោយសង្គ្រាមលោកលើកទី២។

លោក Lauri Malksoo សាស្ត្រាចារ្យច្បាប់អន្តរជាតិ នៅសាកលវិទ្យាល័យ Tartu ក្នុងប្រទេសអេស្តូនី បាននិយាយថា៖ «សារដែលវាផ្ញើមក គឺថា វាអាចមានលទ្ធផលអវិជ្ជមាន យ៉ាងហោចណាស់ សម្រាប់ប្រទេសមហាអំណាច ដែលបំពានលើការហាមឃាត់នៃការប្រើប្រាស់កម្លាំង»។

បន្ទាប់ពីឆ្នាំ១៩៤៥ ប្រជាជាតិនានាបានកំណត់ច្បាប់ ដើម្បីលើកកម្ពស់ច្បាប់អន្តរជាតិ ហើយបានបញ្ជាក់យ៉ាងច្បាស់ថា ព្រំដែនមិនអាចផ្លាស់ប្តូរដោយកម្លាំងទ័ពបានឡើយ៕