ភ្នំពេញ៖ វិទ្យាស្ថានជាតិអប់រំកាយ និងកីឡានៃក្រសួងអប់រំ យុវជន និងកីឡាបានទទួលសមិទ្ធផលថ្មីដែលជាហេដ្ឋារចនាសម្ព័ន្ធសម្រាប់បម្រើឲ្យវិស័យអប់រំកាយ និងកីឡាតម្លៃជាង ៨០ម៉ឺនដុល្លារពីរដ្ឋាភិបាល និងប្រជាជនជប៉ុន។ ពិធីប្រគល់-ទទួលសមិទ្ធផលថ្មីនេះបានធ្វើឡើងក្រោមវត្តមានឯកឧត្តមបណ្ឌិតសភាចារ្យ ហង់ជួន ណារ៉ុង រដ្ឋមន្ដ្រីក្រសួងអប់រំ យុវជន និងកីឡា និងឯកឧត្តម Mikami Masahiro ឯកអគ្គរាជទូតជប៉ុនប្រចាំនៅកម្ពុជាកាលពីថ្ងៃទី០៨ ខែធ្នូ ឆ្នាំ២០២១។
លោកស្រី ហ៊ូ សិទ្ធសោភាល័យ នាយិកាវិទ្យាស្ថានជាតិអប់រំកាយ និងកីឡាបានបង្ហាញសេចក្ដីសោមនស្សរីករាយក្រៃលែងចំពោះពិធីប្រគល់-ទទួល និងសម្ពោធដាក់ឲ្យប្រើប្រាស់ផ្លូវការនូវសមិទ្ធផលថ្មីនេះ ដែលរួមមានផ្លូវរត់អត្តពលកម្ម ៨ខ្សែបន្ទាត់មានតម្លៃសរុប ៩០,៦៤០ដុល្លារដែលជាជំនួយឥតសំណងនៃគម្រោងគូសាណូណិ ព្រមទាំងអាងហែលទឹកខ្នាត ២៥ម៉ែត្រ x ១៥ម៉ែត្រ និងអគារធ្វើលំហាត់ប្រាណដែលបំពាក់សម្ភារៈបរិក្ខាទំនើបៗមានតម្លៃសរុប ៧២១,៥០៥.៨៦ដុល្លារដែលជាជំនួយឥតសំណងសម្របសម្រួលដោយអង្គរការក្រៅរដ្ឋាភិបាលបេះដូងមាស។ ឯកឧត្តមបណ្ឌិតសភាចារ្យ ហង់ជួន ណារ៉ុន បានធ្វើការកោតសរសើរ និងវាយតម្លៃខ្ពស់ចំពោះសមិទ្ធផលការងារថ្មីៗរបស់ស្ថានទូតជប៉ុនប្រចាំនៅកម្ពុជា តាមរយៈគម្រោងគូសាណូណិ និងអង្គរការក្រៅរដ្ឋាភិបាលបេះដូងមាស ដែលជាការរួមចំណែកក្នុងការអភិវឌ្ឍហេដ្ឋារចនាសម្ព័ន្ធ ដើម្បីអភិវឌ្ឍវិទ្យាស្ថានជាតិអប់រំកាយ និងកីឡាឲ្យក្លាជាគ្រឹះស្ថានឧត្តមសិក្សានាពេលអនាគត ស្របតាមគោលនយោបាយជាតិ និងផែនការយុទ្ធសាស្ដ្រអភិវឌ្ឍវិស័យអប់រំកាយ និងកីឡា និងកំណែទម្រង់ស៊ីជម្រៅការងារអប់រំកាយ និងកីឡា។
ឯកឧត្តមបន្ដថា តាមរយៈហេដ្ឋារចនាសម្ព័ន្ធថ្មីនេះនឹងរួមចំណែកយ៉ាងសំខាន់ ក្នុងការបណ្ដុះបណ្ដាលធនធានមនុស្សក្នុងវិស័យអប់រំកាយ និងកីឡា ពិសេសមិនត្រឹមតែប្រើប្រាស់ក្នុងការបង្ហាត់បង្រៀនដល់គរុសិស្ស គរុនិស្សិតនូវមុខវិជ្ជាអត្តពលកម្ម ហែលទឹក និងការធ្វើលំហាត់ប្រាណដោយប្រើប្រាស់ឧបករណ៍លំហាត់ប្រាណបានត្រឹមត្រូវ និងស្ដង់ដាដើម្បីក្លាយជាគ្រូអប់រំកាយ និងកីឡាពោរពេញដោយសមត្ថភាពទៅបម្រើការងារតាមរាជធានី-ខេត្តនោះទេ តែថែមទាំងប្រើប្រាស់ជាប្រយោជន៍ដល់បុគ្គលិកអប់រំទាំងអស់ សិស្សានុសិស្ស និងសាធារណៈជននានាដើម្បីធ្វើលំហាត់ប្រាណ ដើម្បីសុខភាពទៀតផង។ ទន្ទឹមជាមួយគ្នា ឯកឧត្តម Mikami Masahiro បានបង្ហាញក្ដីរំពឹងថា ហេដ្ឋារចនាសម្ព័ន្ធថ្មីនេះរួមចំណែកក្នុងការពង្រឹងវិស័យអប់រំកាយ និងកីឡានៅកម្ពុជា ដែលជាផ្នែកមួយដ៏សំខាន់នៃការអភិវឌ្ឍមូលដ្ឋានគ្រឹះកីឡា ក៏ដូចជាការកសាងនូវធនធានមនុស្សដើម្បីដំណើរឆ្ពោះទៅស៊ីហ្គេម-អាស៊ានប៉ារ៉ាហ្គេមឆ្នាំ២០២៣ នៅកម្ពុជា។ លើសពីនេះ ឯកឧត្តមក៏បានសម្ដែងការគាំទ្រជាបន្ដបន្ទាប់ទៀត ដល់កិច្ចខិតខំប្រឹងប្រែងរបស់រដ្ឋាភិបាលកម្ពុជា ក្នុងការអភិវឌ្ឍវិស័យអប់រំកាយដែលរួមចំណែកដល់សុខភាពផ្លូវកាយ និងផ្លូវចិត្ដរបស់ប្រជាជនកម្ពុជាផងដែរ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
