បាល់ទាត់៖ ក្លិបបាល់ទាត់អធិរាជដំរីឦសានបានជ្រើសរើសកីឡាកររួចរាល់ហើយ បន្ទាប់ពីជូនដំណឹង និងឆ្លងកាត់ការធ្វើតេស្ដកាលពីថ្មីៗដើម្បីត្រៀមចូលរួមការប្រកួតពានរង្វាន់សម្ដេចតេជោ ហ៊ុន សែន លើកទី១៦ (ថ្នាក់ខេត្ត) នាឆ្នាំ២០២២ ខាងមុខ។ លោក អ៊ួន ឧត្តម អគ្គលេខាធិការក្លិបមានមូលដ្ឋាននៅខេត្តរតនគិរីបានបញ្ជាក់ថា បន្ទាប់ពីការជូនដំណឹងក្លិបបានទទួលពាក្យកីឡាករចំនួន ៧៥នាក់ មុនឆ្លងកាត់ការធ្វើតេស្ដចម្រាញ់សល់ ៣០នាក់ដើម្បីត្រៀមការប្រកួតរដូវកាលថ្មីនៃពានរង្វាន់សម្ដេចតេជោនាយករដ្ឋមន្ដ្រី។
លោកសង្កត់ធ្ងន់ថា ចំពោះកីឡាករជ្រើសរើសត្រូវបានផ្ដោតការយកចិត្តទុកដាក់ខ្ពស់ ចំពោះអ្នកស្រលាញ់ចូលចិត្ត និងមានឆន្ទៈខ្ពស់ក្នុងវិស័យមួយនេះ ដើម្បីត្រៀមប្រកួតប្រជែងលើសមរភូមិវាលស្មៅនារដូវកាលថ្មី ហើយក្លិបក៏កំពុងពិចារណារៀបចំឲ្យមានការប្រមូលផ្ដុំហ្វឹកហាត់ឲ្យបានសមរម្យផងដែរ។ គួរដឹងថា ក្នុងរដូវកាលឆ្នាំ២០២១ នេះ ក្លិបអធិរាជដំរីឦសានត្រូវបានដកខ្លួនពីការប្រកួតពានរង្វាន់សម្ដេចតេជោ-ថ្នាក់ខេត្តពាក់កណ្ដាលផ្លូវដោយសារវិបត្តិកូវីដ-១៩ ផង និងបញ្ហាអារម្មណ៍របស់កីឡាករផង។ ការណ៍នេះហើយដែលនាំឲ្យថ្នាក់ដឹកនាំក្លិបសម្រេចដកខ្លួន ហើយបានធ្វើការរុះរើសអមជាមួយការប្រកាសជ្រើសរើសកីឡាករមានឆន្ទៈខ្ពស់ ដើម្បីត្រៀមការប្រកួតនារដូវកាលថ្មីឆ្នាំ២០២២។
សូមបញ្ជាក់ដែលថា ក្រៅពីជ្រើសរើសកីឡាករត្រៀមរដូវកាលថ្មី ក្លិបអធិរាជដំរីឦសានកំពុងរៀបចំសាងសង់កីឡដ្ឋានស្ដង់ដារផ្ទាល់ខ្លួននៅជើងភ្នំស្វាយ ស្ថិតនៅភូមិ ៣ សង្កាត់កាចាញ ក្រុងបានលុង ក្នុងគោលបំណងជំរុញ និងបំផុសសកម្មភាពកីឡាបាល់ទាត់ក្នុងខេត្ត ក៏ដូចជាការរួមចំណែកទាញទេសចរតាមរយៈការប្រកួតផ្សេងៗនៅលើទីលានរបស់ខ្លួន បន្ទាប់ពីសាងសង់រួចរាល់ផងដែរ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
