ទូរទស្សន៍រដ្ឋ CCTV បានរាយការណ៍ថា អគ្គិភ័យដែលបានឆាបឆេះភោជនីយដ្ឋាន នៅភាគឦសានប្រទេសចិន បានបណ្ដាលឲ្យមនុស្ស ២២នាក់ស្លាប់ និង ៣នាក់ទៀត រងរបួស នៅថ្ងៃអង្គារ (ទី២៩ ខែមេសា) នេះ តែប្រព័ន្ធផ្សព្វផ្សាយនេះមិនបានផ្តល់ព័ត៌មានលម្អិត អំពីមូលហេតុនៃចំហេះនេះឡើយ។

សេចក្ដីរាយការណ៍បានឲ្យដឹងថា អគ្គិភ័យបានរលត់ទៅវិញនៅវេលាម៉ោង ១២:២៥នាទីថ្ងៃត្រង់ ម៉ោងក្នុងស្រុក (ត្រូវនឹងម៉ោង ៤:២៥នាទី ម៉ោងសកល) នៅឯភោជនីយដ្ឋាន ក្នុងតំបន់លំនៅឋានមួយកន្លែង ក្នុងទីក្រុង Liaoyang ខេត្ត Liaoning។

ទីភ្នាក់ងារសារព័ត៌មានរដ្ឋ Xinhua បានរាយការណ៍ថា ប្រធានាធិបតីចិន លោក ស៊ី ជីនពីង (Xi Jinping) បានហៅអគ្គិភ័យនេះថា ជា «មេរៀនដ៏សោកសៅ» ហើយបានជំរុញឲ្យមន្ត្រីក្នុងតំបន់ កំណត់ឲ្យបានឆាប់នូវមូលហេតុនាំឲ្យមានអគ្គិភ័យ ព្យាបាលអ្នករបួស និងឃុំខ្លួនអ្នកដែលត្រូវទទួលខុសត្រូវ។

គួររំលឹកថា ការលេចធ្លាយហ្គាស បានបណ្តាលឲ្យមានការផ្ទុះដ៏ធំចំនួន ២ នៅក្នុងតំបន់លំនៅឋាន កាលពីឆ្នាំមុន ដោយការផ្ទុះមួយនៅភោជនីយដ្ឋាន ក្នុងខេត្ត Hebei ភាគខាងជើងរបស់ប្រទេសចិន ក្នុងខែមីនា បានសម្លាប់មនុស្ស ២នាក់ ខណៈ ២៦នាក់រងរបួស ហើយការផ្ទុះមួយទៀតនៅឯអគារខ្ពស់មួយ នៅភាគខាងត្បូងទីក្រុង Shenzhen ក្នុងខែកញ្ញា បានផ្ដាច់ជីវិតមនុស្សម្នាក់៕