ក្រុម ISIS បានសម្លាប់យុទ្ធជនឃើដ ៥នាក់ ក្នុងការវាយប្រហារមួយលើទីក្រុង Deir Az Zor ស្ថិតនៅភាគខាងកើតប្រទេសស៊ីរី ជាហេតុធ្វើឲ្យកើតមានក្តីបារម្ភពីការបះបោររបស់ពួកគេ ។

លោក Farhad Shami គឺជាអ្នកនាំពាក្យកងកម្លាំងប្រជាធិបតេយ្យស៊ីរី(SDF)ដឹកនាំដោយក្រុមឃើដស៊ីរី បញ្ជាក់ប្រាប់ទីភ្នាក់ងារព័ត៌មានរ៉យទ័រកាលពីថ្ងៃចន្ទថា សមាជិករបស់ខ្លួនចំនួន ៥នាក់ ត្រូវបានសម្លាប់នៅក្នុងការវាយប្រហារនេះ ដែលលោកចាត់ទុកថាស្ថិតក្នុងចំណោមការវាយប្រហារស្លាប់មនុស្សច្រើនបំផុតលើក្រុមរបស់លោក ក្នុងមួយរយៈកាលកន្លងមកនេះ ។

គួរឲ្យដឹងថា ទីក្រុង Deir Az Zor ត្រូវដណ្តើមបានដោយក្រុម ISISកាលពីឆ្នាំ ២០១៤ ប៉ុន្តែកងទ័ពស៊ីរី ដណ្តើមយកមកវិញនៅឆ្នាំ ២០១៧ ។

កាលពីមុន ក្រុម ISISធ្លាប់គ្រប់គ្រងតំបន់ជាច្រើននៅស៊ីរី និងអ៊ីរ៉ាក់ រួមទាំងទីក្រុង Raqqa ដែលមានចម្ងាយប្រហែល ១៦០គ.ម ភាគខាងកើតទីក្រុង Aleppo និងទីក្រុង Mosul ស្ថិតនៅភាគខាងជើងប្រទេសអ៊ីរ៉ាក់ ដោយពួកគេដាក់ច្បាប់យ៉ាងតឹងរឹងលើមនុស្សរាប់លាននាក់ ។

អតីតមេដឹកនាំក្រុម ISISលោក Abu Bakr al-Baghdadi បានប្រកាសការិយាល័យព្រះចៅកាលីហ្វលើប្រទេសទាំង ២នេះ កាលពីឆ្នាំ ២០១៤ មុនពេលរូបលោកត្រូវបានសម្លាប់នៅក្នុងការវាយឆ្មក់របស់កងកម្លាំងពិសេសសហរដ្ឋអាមេរិកនៅតំបន់ភាគពាយព្យស៊ីរីកាលពីឆ្នាំ ២០១៩ ស្របពេលដែលក្រុមមួយនេះដួលរលំ ។

ពេលកម្លាំងពួកគេឡើងដល់កម្រិតកំពូល ក្រុមមួយនេះគ្រប់គ្រងតំបន់ស្មើនឹងពាក់កណ្តាលចក្រភពអង់គ្លេស និងល្បីរន្ទឺខ្លាំងសម្រាប់អំពើឃោឃៅរបស់ពួកគេ ។ 

ពួកគេបានកាត់ក្បាលជនស៊ីវិល ប្រហារជីវិតទាហានអ៊ីរ៉ាក់ ១.៧០០នាក់ដែលពួកគេចាប់បាន ក្នុងរយៈពេលខ្លី និងចាប់ស្រ្តីធ្វើជាទាសករ និងចាប់រំលោភសេពសន្ថវៈលើស្រ្តីរាប់ពាន់នាក់ មកពីសហគមន៍ Yazidi ដែលស្ថិតក្នុងចំណោមជនជាតិភាគតិចខាងសាសនាដ៏វ័យចំណាស់បំផុតរបស់អ៊ីរ៉ាក់ ៕