ក្រោយទន្ទឹងរង់ចាំអស់រយៈពេលជាច្រើនឆ្នាំ នៅទីបញ្ចប់ក្រុមហ៊ុន Amazon បានបញ្ជូនផ្កាយរណប Kuiper របស់ខ្លួនទៅកាន់ទីអវកាស ។

ក្រុមហ៊ុនបច្ចេកវិទ្យាខ្នាតយក្សមួយនេះ បានបាញ់បង្ហោះផ្កាយរណប ២៧គ្រឿងលើកដំបូងរបស់ខ្លួនទៅកាន់គន្លងទាបរបស់ផែនដី ចេញពីរដ្ឋ Florida សហរដ្ឋអាមេរិក ដែលជាការចាប់ផ្តើមដាក់ពង្រាយបណ្តាញអ៊ីនធឺណិតពីលើលំហអាកាស ។

វាគឺជាការប្រកួតប្រជែងដ៏ធំមួយនឹងក្រុមហ៊ុនផ្តល់សេវាទូរគមនាគមន៍នៅជុំវិញពិភពលោក ក៏ដូចជាក្រុមហ៊ុន Starlink របស់លោក Elon Musk ។

នេះគឺជាផ្កាយរណបដំបូងក្នុងចំណោមផ្កាយរណប ៣.២០០គ្រឿងដែលក្រុមហ៊ុន Amazon គ្រោងនឹងបាញ់បង្ហោះសម្រាប់គម្រោង Project Kuiper ដែលមានតម្លៃ ១០ពាន់លានដុល្លារ ។

ដូចគ្នានឹងក្រុមហ៊ុន Starlink ដែរ ក្រុមហ៊ុន Amazon បានដាក់ផ្កាយរណប Kuiper របស់ខ្លួននៅតំបន់ដាច់ស្រយាល ជាទីដែលការតភ្ជាប់មិនសូវមាន ឬគ្មានតែម្តង ។

ការបាញ់បង្ហោះផ្កាយរណបលើកដំបូងនេះដែរ ដើមឡើយមានគម្រោងធ្វើឡើងនៅដើមឆ្នាំ ២០២៤ ប៉ុន្តែវាត្រូវបានពន្យាពេលជាង ១ឆ្នាំ ។

ក្រុមនិយ័តករសហរដ្ឋអាមេរិក ចង់ឲ្យពាក់កណ្តាលនៃផ្កាយរណបទាំងនេះ បាញ់បង្ហោះនៅពាក់កណ្តាលឆ្នាំក្រោយ ប៉ុន្តែត្រូវបានពន្យាពេលមកទល់នឹងពេលនេះ ដែលក្រុមអ្នកជំនាញនិយាយថាក្រុមហ៊ុន Amazon អាចនឹងស្នើសុំបន្តពេលបន្ថែមទៀត ៕